le cmalu noltru

.i finti fa la'o me. Antoine de Saint-Exupéry .me

.i fanva fa la .xorxes.

ni'o ni'o no mo'o

ni'o salci la'o zoi Léon Werth zoi

ni'o ko mi fraxu doi verba lo nu mi salci lo makcu prenu lo dei cukta .i lo se junri be mi cu krinu .i lo bi'unai makcu prenu cu xagrai lo pendo be mi .i lo drata cu krinu .i lo bi'unai makcu prenu cu kakne lo nu jimpe fi roda .e ji'asai lo cukta be fo lo verba .i lo cimoi cu krinu .i lo bi'unai makcu prenu cu xabju lo fraso noi py xagji gi'e lenku lifri bu'u ke'a .i py ja'a nitcu lo nu se drijdikygau .i mi va'o ro nu ro lo krinu na banzu cu djica lo nu salci fi lo cukta fe lo verba poi lo bi'unai makcu prenu cu me ke'a ca lo purci .i ro makcu prenu cu verba ca lo cfari (to ku'i so'uboi py cu morji toi) .i ja'o mi dragau lo mi salci selsku

ni'o salci la'o zoi León Werth zoi
pe ca lo nu ly verba

ni'o ni'o pa mo'o

ni'o mi ca lo nu mi nanca li xa cu paroi viska lo banli pixra pe lo cukta be la cilce ricfoi be'o noi se tcita «lu se lifri lisri li'u» .i py pixra lo sincrboa noi tunlo lo danlu .i di'e fukpi lo pixra

tunlo sincrboa

ni'o fo lo cukta cu cusku «lu lo sincrboa cu tunlo lo se kalte be sy fau lo nu ky mulno gi'enai se marxa .ibabo sy de'a kakne lo nu muvdu kei gi'e sipna ze'a lo masti be li xa be'o poi se kuspe lo befctiru'e li'u»

ni'o mu'i ku mi mutce pensi lo cicricfoi se lifri gi'e baza snada lo nu mi sepi'o lo skari pinsi cu finti lo mi pamoi pixra .i lo mi pixra pamoi cu simsa di'e

ganlo sincrboa

ni'o mi jarco lo mi ralju se finti lo makcu prenu gi'e preti cusku fi py fe lo sedu'u xukau lo mi pixra cu jai se terpa py

ni'o py spuda cusku fi mi fe «lu ue lo mapku cu jai se terpa fai ma li'u»

ni'o lo mi se finti cu na pixra lo mapku .i pixra lo sincrboa poi ba'o tunlo lo xanto .iseki'ubo mi pirfi'i lo nenri be lo sincrboa tezu'e lo nu lo makcu prenu cu kakne lo nu jimpe .i py roroi nitcu lo ve ciksi .i lo mi pixra remoi cu simsa di'e

kalri sincrboa

ni'o lo makcu prenu cu stidi fi mi fe lo du'u mi cliva lo pixra be lo sincrboa poi kalri gi'a ganlo ku'o gi'e co'a se cinri lo tedyske .e lo cirske .e lo cmaci .e lo gerna .isemu'ibo mi cliva ca lo nu mi nanca li xa kei lo pu'o banli jibri be lo pirlarpre .i mi se tolxlu fo lo nu fliba fa lo mi pixra pamoi .e lo mi pixra remoi .i lo makcu prenu cu noroi jimpe da zu'e py po'o .ije tatpi fa lo verba lo nu roroi ciksi

ni'o mi ki'u bilga lo nu cuxna lo drata jibri .ije mi cilre fi lo nu jatna lo vinji .i mi vofli fe'eru'inai ve'a lo mulno munje .i lo tedyske ja'a sa'e mutce selfu mi .i mi kakne lo nu ca lo nu ze'i pare'u catlu cu djuno lo du'u da du lo jugygu'e jikau la .arizonas. .i la'e di'u mutce se pilno va'o ro nu farcri ca lo nicte

ni'o mi taiku ze'a lo mi nunjmive cu so'iroi penmi so'i junri prenu .i mi ze'u jbini lo makcu prenu .i mi jibni mutce viska py .i la'e di'u na xagzenri'a lo mi se jinvi

ni'o gau mi ca lo nu penmi paboi py poi ke'a simlu fi mi fe lo ka milxe prije cu cipra fi py fa tu'a lo mi pixra pamoi noi mi ru'i ponse .i mi djica lo nu djuno lo du'u xukau py ca'a jimpe kakne .i ku'i roroi ku py spuda cusku «lu ta mapku li'u» .iseki'ubo mi py tavla genai lo sincrboa gigenai lo cilce ricfoi ginai lo tarci .i mi mi punji lo se kuspe be py .i mi py tavla lo nu kelcrbridji .e lo nu kelcrgolfi .e lo jecta srana .e lo nebysrijge .i lo makcu prenu cu mutce gleki lo nu se slabu lo nanmu poi tai racli

ni'o ni'o re mo'o

ni'o taiku mi ze'a nonkansa secau lo prenu poi mi ke'a ka'e fatci tavla ku'o co'u lo nu spofu bu'u lo kutytu'a po'u la .sa'aras. pu za lo nanca be li xa .i da ba'o porpi ne'i lo mi matra .i mi kansa genai lo mi'icre ginai lo se vinji prenu .iseki'ubo mi pu'o bredi lo nu nonkansa troci lo nu snada lo nandu nu cikre .i lo cuntu cu srana lo du'u mi za'o jmive gi'ikau mrobi'o .i mi ponse lo djacu poi ka'e pinxe ze'a lo djedi be li su'ebi po'o

ni'o ca lo pamoi vanci mi sipna bu'u lo canre ki lo se xabju tumla vu lo minli be li ki'o .i mi zmadu lo porpi bloti prenu noi cpana lo fultapla bu'u lo xamsi midju ku'o lo ka sepli .iseki'ubo do ka'e se xanri lo nu mi se spaji lo nu ca lo co'a donri lo xajmi ke cmalu voksa mi cikygau .i vy cusku di'e

— .i .e'o ko pirfi'i lo lanpanzi seva'u mi

— .i ke'o

— .i ko pirfi'i lo lanpanzi seva'u mi

ni'o mi co'a sanli fi lo mi jamfu tai lo nu da'i mi se lindi .i mi carmi satre lo mi kanla .i mi carmi catlu .i mi viska lo tolfadni ke cmalu prenu noi junri lanli mi .i di'e xagrai pixra be py be'o noi mi baza snada lo nu finti ke'a .i ku'i li'a lo mi pixra cu mutce mleca lo se pixra lo ka se manci .i mi na fuzme .i mi se tolxlu lo makcu prenu lo nu pirlarcu se jibri kei ca lo nu mi nanca li xa kei gi'enai cilre fi lo nu pirfi'i na'e bo lo sincrboa poi kalri gi'a ganlo

ni'o mi catlu lo tolcanci fau lo nu lo mi kanla cu barda cukla seja'e lo nu spaji .i ko na tolmorji lo du'u mi zvati ki lo se xabju tumla vu lo minli be li ki'o .i ku'i lo cmalu prenu na simlu lo ka farcri gi'a tatpi morsi gi'a xagji morsi gi'a taske morsi gi'a terpa morsi .i py nasai simlu lo ka verba co farcri lo midju be lo kutytu'a ki lo se xabju tumla vu lo minli be li ki'o .i mi ca lo nu uo snada lo nu tavla cu cusku di'e py

— .i .y do va mo

ni'o py mutce tolxanka je junri ke krefu cusku di'e

— .i .e'o ko pirfi'i lo lanpanzi seva'u mi

ni'o da ca lo nu lo cizra cu dukse lo ka se manci cu na darsi lo nu toltinbe .i simlu lo ka tolracli kei ki lo se xabju tumla vu lo minli be li ki'o fau lo nu morsi ckape .isemu'inaibo mi tolse'a lo pelji boxfo .e lo penbi lo mi daski .i ku'i mi morji lo du'u mi ralju cilre fi lo tedyske .e lo cirske .e lo cmaci .e lo gerna kei gi'e cusku fi lo cmalu prenu (to fau lo nu mi milxe se fanza toi) fe lo sedu'u mi na kakne lo nu pirfi'i .i py spuda cusku di'e

— .i na vajni .i ko pirfi'i lo lanpanzi seva'u mi

ni'o mi noroi pu pirfi'i lo lanpanzi .i seki'ubo mi krefu finti seva'u py pa lo re po'o pixra poi mi kakne .i lo me lo ganlo sincrboa moi .i mi traji se spaji lo nu tirna lo nu lo cmalu prenu cu spuda cusku di'e

— .i na'i .i mi na djica lo me lo xanto poi nenri lo sincrboa moi .i lo sincrboa cu mutce lo ka ckape .ije lo xanto cu mutce lo ka fanza .i lo mi zdani cu cmalu mutce .i mi nitcu lo lanpanzi .i ko pirfi'i lo lanpanzi seva'u mi

ni'o ba ku mi pirfi'i

bilma lanpanzi

ni'o py jundi catlu .i di'e

— .i na'i .i ta mutce lo ka bilma .i ko finti lo drata

ni'o mi pirfi'i di'e

lanynakni

ni'o lo mi pendo cu xendo cisma fau lo nu fraxu

— .i za'asaidai ta lanpanzi nagi'e lanynakni .i ta se jirna

ni'o mi mu'i krefu finti lo mi pixra

tolci'o lanpanzi

ni'o ku'i na'e se zanru tai tu'a lo lidne

— .i ta dukse lo ka tolci'o .i mi djica lo lanpanzi poi ba ze'u jmive

ni'o ba ku secau lo nunsurla mi fau lo nu sutydji lo nu co'a toljajgau lo mi matra cu malfi'i lo di'e pixra

tanxe

ni'o mi bacru di'e

— .i ta tanxe .i lo lanpanzi poi do djica cu nenri

ni'o ku'i mi mutce lo ka se spaji lo nu viska lo nu lo flira be lo mi citno pajni cu se gusni

— .i ta prane lo ka mi djica .i pe'ipei lo vi lanpanzi cu nitcu lo mutce srasu

— .i ki'u ma

— .i ki'u lo nu lo mi zdani cu cmalu mutce

— .i ju'o banzu .i mi dunda lo cmalu mutce lanpanzi do

ni'o py sa'orgau lo stedu fa'a lo pixra

— .i na tai cmalu .i ua ta sipna

ni'o tai la'e di'u mi co'a se slabu lo cmalu noltru

ni'o ni'o ci mo'o

ni'o mi ze'u jmibi'o lo du'u ny ba'o klama fi makau .i lo cmalu noltru noi retsku so'i da mi cu noroi simlu lo ka jimpe fi lo memimoi .i lo cunso se bacru valsi cu di'i jungau mi roda .i taiku ny ca lo nu pare'u sanji lo mi vinji (to mi na pirfi'i lo mi vinji .i lo pixra cu dukse lo ka pluja kei lo me mi moi toi) cu preti cusku di'e mi

— .i lo va dacti cu mo

— .i ta na dacti .i ta vofli .i ta vinji .i ta me lo mi vinji

ni'o mi jgira lo nu jungau ny lo du'u mi vofli .ibabo ny ki'asku di'e

— .i ue do ba'o farlu fi lo tsani

— .i go'i —sei mi cumla cusku

— .i ua xajmi

ni'o lo cmalu noltru cu bacru lo gleki nu cmila noi mutce fanza mi .i mi djica lo nu da junri lo mi malfunca .ibabo ny jmina cusku di'e

— .i ja'o do ji'a klama fi lo tsani .i ma terdi do

ni'o mi ze'i vismli lo guska'u lo cizra po'u lo nu ny zvati .i mi bikla terpreti

— .i xu ja'o do klama fi lo drata terdi

ni'o ku'i ny na spuda .i ny tolvlile deskygau lo stedu ca'o lo nu catlu lo mi vinji

— .i je'u do na ka'e klama fi lo darno mutce fu ta

ni'o ny jinru lo ze'u se senva .ibabo ny tolse'a lo mi lanpanzi lo ny daski gi'e sfubu lo nu manci catlu lo ny dirba

ni'o do se xanri lo du'u tai makau mi kucli gau lo xadba selsku pe lo drata terdi .i mi troci lo nu djuno zenba

— .i do klama fi ma doi cmalu prenu .i ma stuzi lo do zdani .i do djica lo nu bevri lo mi lanpanzi ma

ni'o ny spuda mi di'e ba lo pensi smaji

— .i xamgu fa lo tanxe poi do ke'a mi dunda ku'o fi lo nu ty ca lo nicte cu selfu ly lo nu zdani

— .i li'a .i ji'a mi va'o ro nu do clite cu ba dunda lo skori do tezu'e lo nu ly jorne ca lo donri .i go'i lo grana

ni'o lo se friti cu simlu lo ka jenca lo cmalu noltru

— .i xu jorne .i ue xajmi sidbo

— .i ku'i ly va'o ro nu na jorne gau do cu ba klama makau gi'e ba se cirko

ni'o lo mi pendo cu za'ure'u bacru lo nu cmila

— .i ku'i ly ka'e klama ma

— .i makau .i lo sirji crane be ly

ni'o ba ku lo cmalu noltru cu junri te pinka

— .i na vajni .i lo mi zdani cu tai cmalu

ni'o fau lo nu ju'ocu'i badri milxe cu jmina cusku di'e

— .i da fa'a lo sirji crane cu na ka'e klama lo darno mutce

ni'o ni'o vo mo'o

ni'o taiku mi ba'o facki lo remoi ke vajni datni noi du'u lo ny krasi plini cu ja'aru'e zmadu lo zdani lo ka barda

ni'o la'e di'u mi na ka'e mutce spaji .i mi djuno lo du'u pa'a lo barda plini no'umu'a la .terd. joi la .jupiter. joi la .mars. joi la .venus. vu'o noi da ke'a de cmene cu zasti fa ji'a lo xecto be lo drata noi su'oroi tai cmalu ja'e lo nu nandu fa lo nu viska ke'a sepi'o lo darvistci .i ca lo nu lo tarskepre co'a facki fi pa lo cmalu cu te cmene ri lo namcu .i mu'a cmene fa «lu lo plinycma po'u li 3251 li'u»

ni'o mi jinvi fo lo se junri fe lo du'u lo plini poi terdi lo cmalu noltru cu me lo plinycma po'u li B612 .i papo'oroi viska lo di'u plinycma sepi'o lo darvistci .i lo turko tarskepre cu go'i ca li 1909

ni'o ty banli jarco lo ty te facki bu'u lo tarske ke sornai nunjmaji .i ku'i noda lacri ty .i mu'i bo ty dasni makau .i lo makcu prenu cu tai zukte

ni'o xamgu lo nunmisno pe lo plinycma po'u li B612 fa lo nu lo turko raitru cu bigygau lo ry se turni lo nu dasni tai lo ropno .i lo tarskepre cu rere'u jarco ca li 1920 fau lo nu dasni lo melmapti mutce .i ca lo ca krefu roda tugni ty

ni'o mi te lisri lo plinycma po'u li B612 lo di'u tcila do gi'e lacri do tu'a lo py namcu ki'u tu'a lo makcu prenu .i lo makcu prenu cu prami lo namcu .i py ca lo nu do py tavla lo cnino pendo cu noroi te preti lo vajrai .i py noroi cusku «lu ma sance lo ra voksa .i ra zmanei lo mo nunkei .i xu ra crepu lo toldi li'u» .i py preti cusku «lu ra nanca li xo .i xoda tunba ra .i ra ki'ogra li xo .i lo ra patfu cu jerna lo rupnu be li xo li'u» .ibabo py jinvi lo du'u cypy slabu py .i py va'o ro nu do cusku fi lo makcu prenu fe «lu mi pu viska lo melbi zdani ne lo xunblabi bliku zi'e noi lo xrulrgeraniu cu zvati lo canko zi'e noi lo tcacpi cu cpana lo drudi li'u» cu na kakne lo nu se xanri lo zdani .i .ei cusku «lu mi pu viska lo zdani pe lo rupnu be li panonoki'o .isemu'ibo py ki'asku «lu ua melbi li'u»

ni'o taiku py va'o ro nu do cusku «lu lo du'u lo cmalu noltru cu zasti cu se je'urja'o lo nu ny se manci gi'e cmila gi'e djica lo lanpanzi .i lo nu da djica lo lanpanzi cu je'urja'o lo du'u da zasti li'u» cu galgau lo janco gi'e tarti tai lo nu do verba .i ku'i py va'o ro nu do cusku «lu ny se terdi lo plinycma po'u li B612 li'u» cu se birtygau gi'enai jai fanza do fai tu'a lo preti .i py zukte tai la'e di'u .i .ei na xebni py .i .ei lo verba cu mutce fraxu lo makcu prenu

ni'o ki'u li'a ma'a poi jimpe fi lo nunjmive cu ckasu lo namcu .i .au mi co'a te lisri fi dei tai tu'a lo crida lisri .i .au mi cusku «lu puzuvuku lo cmalu noltru cu xabju lo terdi noi ja'aru'e zmadu ny lo ka barda ku'o gi'e nitcu lo pendo li'u» .i du'o lo jimpe be fi lo nunjmive la'e di'u simlu lo ka zmadu fi lo ka jetnu

ni'o ki'uku mi na nelci lo nu da xalbo tcidu lo mi cukta .i mi lifri lo tai se dunku ca lo nu mi te lisri fi lo dei se morji .i za lo nanca be li xa lo mi pendo pu cliva co kansa lo py lanpanzi .i mi troci lo nu skicu py kei tezu'e lo nu na tolmorji fi py .i badri fa lo nu tolmorji fi lo pendo .i naku ro prenu cu se pendo da .i mi ka'e binxo lo makcu prenu noi se cinri no na'e bo lo namcu .i ki'u la'e di'u ji'a mi pu te vecnu lo skari joi pinsi tanxe .i nandu fa lo nu da za'ure'u co'a pirfi'i ca lo nu nanca lo memimoi kei kei va'o ro nu da noroi troci lo drata be lo nu co'e lo kalri sincrboa .a lo ganlo sincrboa ca lo nu nanca li xa .i li'a mi ba troci lo nu pirfi'i lo traji be lo ka simsa .i ku'i mi na mulno birti lo du'u snada .i lo pixra cu mapti .i lo drata na'e simsa .i mi milxe srera ji'a tu'a lo ka barda .i viku lo cmalu noltru cu dukse lo ka barda .i vaku dukse lo ka cmalu .i mi senpi ji'a fi lo skari be lo ny taxfu .iseki'ubo mi juxre troci tai ti tai ta ja'e lo zabna ja'e lo mabla .i mi ba srera tu'a lo vajni mutce tcila .i ku'i .ei fraxu mi la'e di'u .i lo mi pendo noroi ciksi .i ju'ocu'i py jinvi lo du'u mi py simsa .i ku'i uinai mi na kakne lo nu viska lo lanpanzi pa'o lo tanxe .i ju'ocu'i mi milxe simsa lo makcu prenu .i la'a mi ba'o tolci'obi'o

ni'o ni'o mu mo'o

ni'o ca ro donri mi cilre da lo plini .a lo nu cliva .a lo nu litru .i la'e di'u masno fasnu fau lo nu cunso pensi .i taiku ca lo cimoi donri mi djuno fi lo betri pe lo tricrbaobao

ni'o ca lo ca krefu ji'a za'ure'u fasnu seja'e lo lanpanzi .iki'ubo lo cmalu noltru cu suksa retsku di'e mi tai lo nu junri senpi

— .i je'usaipei lo lanpanzi cu citka lo dzispa

— .i go'i je'u

— .i .o'u mi gleki

ni'o mi na jimpe lo du'u ki'u makau tai vajni fa lo nu lo lanpanzi cu citka lo dzispa .i ku'i lo cmalu noltru cu jmina cusku

— .iseni'ibo xu ly citka lo tricrbaobao ji'a

ni'o mi fa'irgau lo cmalu noltru lo du'u lo tricrbaobao cu dzispa nagi'eku'i tricu co barda fi lo malsi kei .e lo du'u lo xanto so'imei ji'asai va'o ro nu da'i ny bevri xy cu na ka'e mo'u citka lo paji'asai tricrbaobao

ni'o lo sidbo be lo xanto so'imei cu cmilygau lo cmalu noltru

— .i da'i .ei gasnu lo nu xy simxu lo ka cpana

ni'o ku'i ny prije cusku di'e

— .i lo tricrbaobao pu lo nu banro cu cfari fau lo nu cmalu

— .i drani .i ku'i mu'i ma do djica lo nu lo do lanpanzi cu citka lo cmalu tricrbaobao

ni'o ny mi spuda «lu ie li'a li'u» tai lo nu frili se jimpe .i mi nitcu lo nandu ke menli nuntoi lo nu mi nonkansa jimpe fi lo nabmi

ni'o je'u zvati lo terdi be lo cmalu noltru tai lo nu zvati ro terdi kei fa lo xamgu srasu .e lo xlali srasu .i seni'ibo go'i fa lo xamgu tsiju be lo xamgu srasu be'o .e lo xlali tsiju be lo xlali srasu .i ku'i lo tsiju na ka'e se viska .i ty sipna ne'i lo se mipri be lo terdi co'u lo nu sidbo fi pa boi ty fa lo nu ty cikna binxo .ibabo ty preja gi'e catke fau lo nu toldarsi ca lo cfari kei fa'a lo solri lo cmalu ke tolckape jicycma .i ty va'o ro nu jicycma lo samcu .a lo rozgu cu catke .e'a tai lo pluka be ty .i ku'i da va'o ro nu xlali spati cu vimcu .ei lo spati co'a lo nu da facki fi sy .i ju'a lo xlali mutce tsiju cu zvati lo terdi be lo cmalu noltru .i tsiju lo tricrbaobao .i lo loldi be lo terdi cu culno ty .i ju'a lo tricrbaobao zo'u da va'o lo nu lerci dukse facki fi ty cu ze'eba na kakne lo nu vimcu ty .i ty se canlu lo terdi .i ty gregau lo genja lo terdi .i va'o ro nu ge lo terdi cu dukse lo ka cmalu gi lo tricrbaobao cu dukse lo ka se kancu fi makau cu spoja fa lo terdi gau ty

ni'o «lu srana lo nu cnici —sei lo cmalu noltru fi mi ba cusku— .i da ba lo nu mo'u lumci vo'a ca lo cerni cu kurji lumci .ei lo terdi .i .ei da bilgygau vo'a lo nu di'i vimcu lo tricrbaobao co'a lo nu ficysanji ty lo rozgu noi ty mutce simsa ke'a ca lo nu ty mutce citno .i lo nu gunka cu mutce tolzdi gi'eku'i mutce frili li'u»

ni'o ca da ny stidi fi mi fe lo nu mi troci lo nu finti lo melbi pixra kei tezu'e lo nu gasnu lo nu mulno jimpe la'e di'u fa lo verba pe lo mi terdi .i «lu la'e di'u va'o ro nu vy litru ca da —sei ny cusku— cu ka'e xamgu vy .i su'oroi na raktu fa lo nu bavypunji lo nu gunka .i ku'i va'o ro nu srana lo tricrbaobao cu roroi raktu mutce .i mi se slabu lo plini poi se xabju lo lazni .i ly naljunri ci dzispa li'u»

ni'o fi'o gidva lo cmalu noltru mi pirfi'i lo di'u plini .i mi nasai nelci lo nu mi marde cusku .i ku'i lo ckape pe lo tricrbaobao cu tai tolmutce te djuno .ijebo lo se tolnu'a be lo farcri be bu'u lo plinycma cu tai vajni .isemu'ibo paroiku mi na'e tarti lo nu mi jinzi sezyfanta .i mi cusku «lu doi verba ko jundi lo tricrbaobao li'u» .i mi kajde lo mi pendo lo ckape poi py ne pa'a mi ze'upu lamji ke'a secau lo nu sanji .isezu'ebo mi tai mutce gunka tu'a lo vi pixra .i lo te ctuca be fi mi cu vamji lo nu troci .i ju'ocu'i do retsku fi do fe lo sedu'u ki'u makau na zvati lo dei cukta fa lo drata pixra poi dunli lo pixra be lo tricrbaobao lo ka banli .i lo danfu cu sampu mutce .i mi troci gi'eku'i na snada .i mi ca lo nu mi pirfi'i lo tricrbaobao cu jai se bapli lo se cinmo pe lo nu vaitcu

ni'o ni'o xa mo'o

ni'o iu doi cmalu noltru mi ca'o jimpe taiku fi lo do badri ke cmalu nunjmive .i do ze'u se zdile no na'e bo lo nu xutla pe lo solri nu canci .i mi facki lo di'u cnino tcila ca lo cerni be lo vomoi donri ca lo nu do cusku di'e

— .i mi mutce nelci lo solri nu canci .i .e'u mi'o viska lo solri nu canci

— .i ku'i .e'i mi'o denpa

— .i denpa ma

— .i denpa lo nu lo solri cu canci

ni'o do simlu lo ka mutce se spaji kei ca lo cfari .ibabo do do mi'afra .i do fi mi cusku di'e

— .i ue mi za'o krici lo du'u mi zvati lo memimoi

ni'o je'u ka'u lo solri ca lo nu dormidju fi lo mergu'e cu canci lo fasygu'e .i lo nu klama lo fasygu'e ze'i lo mentu cu banzu lo nu zvati lo solri nu canci .i ku'i uinai lo fasygu'e cu mutce lo ka darno .i ku'i bu'u lo do tai cmalu terdi cu banzu fa lo nu bevri lo do stizu ve'a lo taplai be li so'o .i do viska lo solri nuncanci ca ro krefu poi do djica

— .i ca lo djedi mi viska lo nu lo solri cu vociroi canci

ni'o bazaku do jmina cusku di'e

— .i .o'e da ca lo nu tai badri cu mutce nelci lo solri nu canci

— .i ja'o do ca lo djedi pe lo voci krefu cu tai badri pei

ni'o ku'i lo cmalu noltru na spuda

ni'o ni'o ze mo'o

ni'o ca lo mumoi donri fi'o za'ure'u se jalge tu'a lo lanpanzi lo di'e se mipri pe lo nunjmive be lo cmalu noltru cu binxo lo to'e se mipri be fi mi .i ny suksa retsku di'e mi secau lo pruselsku tai lo nu jalge lo nu ze'u smaji pensi lo nabmi

— .i pau lo lanpanzi tai lo nu ly citka lo dzispa cu citka lo xrula ji'a xu

— .i lo lanpanzi cu citka ro se penmi be ly

— .i xu go'i lo xrula ji'asai poi se pagbu lo kinli

— .i ja'a go'i lo xrula ji'asai poi se pagbu lo kinli

— .i va'oku lo kinli cu selfu fi ma

ni'o mi na djuno .i mi ca'o mutce lo ka gunka lo nu troci lo nu vimcu lo dukse tagji klupe lo mi matra .i mi mutce lo ka dunku .iki'ubo ge lo nu spofu cu co'a simlu lo ka vajni gi lo se pinxe djacu noi se xaksu cu gasnu lo nu mi tepkanpe lo xlarai

— .i lo kinli cu selfu fi ma

ni'o lo cmalu noltru noroi sisti tu'a lo preti ca lo nu ny ba'o cusku py .i mi se fanza lo mi klupe gi'e spusku lo cunso

— .i lo kinli cu selfu fi noda .i curve jalge lo nu lo xrula cu palci

— .i ue

ni'o ku'i ny ba lo nu smaji cu renro di'e mi fau lo nu milxe fengu

— .i ianai .i lo xrula cu ralci .i xy na palci .i xy nurgau xy ta'i lo se kakne .i xy krici lo du'u xy selteptce fau tu'a lo xy kinli

ni'o mi spusku noda .i ca lo ca mokca mi fi mi cusku «lu lo vi klupe va'o lo nu ky za'o xarnu cu ba plipe gau mi sepi'o lo nu mruli darxi li'u» .i lo cmalu noltru za'ure'u dicra lo nu mi pensi

— .i pau do jinvi fi lo xrula .y

— .i na go'i .i mi jinvi noda .i mi pu spusku lo cunso .i mi gunka lo se junri cuntu

ni'o ny catlu mi fau lo nu se spaji

— .i ue lo se junri cuntu

ni'o ny viska mi fau lo nu lo mruli cu zvati lo xance kei .e lo nu lo degji cu grasu xekri .e lo nu mi salpo fa'a lo dacti noi simlu fi ny fe lo ka mutce tolmelbi

— .i do tavla tai tu'a lo makcu prenu

ni'o la'e di'u rinka lo nu mi milxe ckeji .i ku'i ny nalkecti ke jmina cusku di'e

— .i do cfipygau lo roda .i do xregau lo roda

ni'o ny mutce se fanza je'u .i ny deskygau bu'u lo brife lo solji skari kerfa

— .i mi djuno fi lo plini poi se zvati lo xunre nanmu .i ny noroi sumne lo xrula .i ny noroi catlu lo tarci .i ny noroi prami lo prenu .i ny noroi zukte na'e bo lo nu kanji .i ze'a piro donri ny rapli cusku tai tu'a do «lu mi junri nanmu .i mi junri nanmu li'u» .i la'e di'u rinka lo nu ny jgira .i ku'i ny na nanmu .i ny gumri

— .i ny mo

— .i ny gumri

ni'o lo cmalu noltru cu blabi ri'a lo nu fengu

— .i ze'u lo nanca be lo megdo lo xrula cu zbasu lo kinli .iji'a ze'u lo nanca be lo megdo lo lanpanzi cu citka lo xrula .i xu na junri fau lo nu sisku lo nu jimpe lo du'u ki'u makau xy tai gunka lo nu zbasu lo kinli poi selfu fi noda .i xu na vajni fa lo nu jamna fa lo lanpanzi lo xrula .i xu na zmadu fi lo ka vajni .e lo ka jai fau junri kei fe lo nu kanji fa lo rotsu ke xunre nanmu .i mi se slabu lo xrula noi pamei se steci fi lo munje zi'e noi zasti bu'u no na'ebo lo mi terdi zi'e noi lo cmalu lanpanzi ka'e daspo ze'iku taiku ca lo cerni secau lo nu ly sanji lo se gasnu .i xu la'e di'u na vajni

ni'o ny xunre binxo .ibabo di'a co'e

— .i lo nu da prami lo xrula noi zasti fa pa ke'a bu'u lo megdo be lo megdo be lo tarci cu banzu lo nu da gleki lo nu catlu ty .i da cusku fi da fe «lu lo mi xrula cu zvati piso'u ta li'u» .i ku'i lo nu lo lanpanzi cu citka lo xrula cu simsa ci'o da lo nu ro tarci cu suksa naltergu'ibi'o .i uesai na vajni fa la'e di'u

ni'o ny na kakne lo nu jmina cusku .i ny spoja lo nu klaku .i lo nicte ba'o tolcanci .i mi ba'o falcru lo mi tutci .i mi ja'asai ckasu lo mi mruli .e lo mi klupe .e lo nu taske .e lo nu morsi .i zvati lo tarci di'o lo terdi no'u lo memimoi no'u la .terd. fa lo cmalu noltru noi nitcu lo nu se kurji .i mi jgari ny lo birka .i mi sligau ny .i mi cusku fi ny fe «lu lo xrula poi do prami cu na se ckape .i mi ba pirfi'i lo molgai seva'u lo do lanpanzi .i mi ba pirfi'i seva'u do lo marbi be lo do xrula .i mi .y li'u» .i mi na djuno fi lo nu .ei mi cusku makau .i mi cinmo lo nu mutce lo ka juxre .i mi na djuno fi lo nu ta'i makau mi ny penmi gi'a pruxi jorne .i tai cizra fa lo se klaku gugde

ni'o ni'o bi mo'o

ni'o mi ze'i cilre fi lo nu djuno fi lo bi'unai xrula .i ze'epu ta'e zvati lo terdi be lo cmalu noltru fa lo sampu mutce xrula noi se jadni papo'o djine be lo rulpezli zi'e noi ja'aru'e se canlu zi'e noi fanza noda .i xy tolcanci ca lo cerni lo srasu .ibabo xy canci ca lo vanci .i ku'i lo bi'unai xrula co'a te tsiju ca lo djedi fi da poi se bevri fo lo na te djuno .i lo cmalu noltru cu jibni jundi lo stanycma noi na simsa lo drata stanycma .i cumki fa lo nu cnino klesi lo tricrbaobao .i ku'i lo dzispa bazi sisti lo nu banro kei gi'e co'a zbasu lo xrula .i lo cmalu noltru noi zvati lo nu zvagau lo barda balji cu birti lo du'u ba barkla by fa lo se manci tolcanci .i ku'i lo xrula za'o na mo'u brebi'o lo nu melbi kei fi'o marbi lo xy crino kumfa .i xy jundi cuxna lo xy skari .i xy masno lo nu dasni binxo .i xy stika ro lo rulpezli .i xy na djica lo nu barkla fau lo nu xy mulno se cinje tai tu'a lo xrulrpapavera .i xy na djica lo nu tolcanci fau na'ebo lo mulno nu dirce lo nu xy melbi .i ie xy mutce lo ka meltritra .i lo se mipri nu xy brebi'o cu djedi li so'o gi'ebabo djedi li so'i .ibabo xy ca lo cerni ca lo tcika be lo solri nu tolcanci cu jarco vo'a

ni'o xy noi pu tai tcila gunka cu cusku di'e fau lo nu sipna frumu

— .i .a'i mi ja'aru'e co'a cikna .i ko mi fraxu .i .u'u mi za'o mulno krekalsa

ni'o lo cmalu noltru ka'enai rivbi lo nu manci

— .i .u'e do melbi

— .i go'i pei —sei lo xrula cu xutla spusku— .i mi dunli lo solri lo ka jbena ca makau

ni'o lo cmalu noltru cu drani smadi lo du'u xy na mutce lo ka cumla .i ku'i xy tai cnigau

— .i pe'i tcika tu'a lo cerni sanmi —sei xy bazi jmina cusku— .i da'i do mi xendo lo nu pensi mi

ni'o lo cmalu noltru fau lo nu mulno se cfipu kei ca lo nu ba'o tolcri lo jaursabytci cu vifne djacu selfu lo xrula

ni'o taiku xy fanza ny fau lo nu xy badri milxe jgira .i mu'a xy ca lo donri fau lo nu tavla fi lo vo kinli po'e xy cu cusku di'e lo cmalu noltru

— .i .e'e klama ti fa lo tirxu noi se jgalu

— .i no tirxu cu zvati lo mi terdi —sei lo cmalu noltru cu fapro cusku— .i ji'a lo tirxu na citka lo srasu

— .i mi na srasu —sei lo xrula cu xutla spusku

— .i ko mi fraxu

— .i mi na terpa lo tirxu .i ku'i mi mutce terpa lo vacri flecu .i xu do ponse lo bifmarbi

ni'o «lu mutce terpa lo vacri flecu .i na zabna funca lo spati —sei lo cmalu noltru cu zgana— .i lo vi xrula cu mutce pluja li'u»

— .i ca ro vanci do mi ba setca lo blacygai .i mutce lenku bu'u lo medomoi .i xlali stuzi .i bu'u lo te klama be fi mi .y

ni'o ku'i xy dicra vo'a .i xy pu klama fau lo nu tsiju .i xy ka'enai pu se slabu lo drata terdi .i xy fau lo nu ckeji lo nu curmi lo nu da facki fi lo nu xy bregau lo tai klina jitfa cu so'uji'iciroi kafke tezu'e lo nu lo cmalu noltru cu zungi

— .i xu lo bifmarbi

— .i mi pu'o klama tezu'e lo nu tolcri .i ku'i do mi tavla

ni'o xy bapli lo nu kafke kei tezu'e lo nu frigau ny lo zugyselcni

ni'o taiku lo cmalu noltru mu'inai lo zabna terzu'e pe lo ny nunprami bazi tolylacri xy .i ny junri jundi lo na'e vajni valsi gi'e binxo lo mutce tolgei

ni'o «lu .ei mi pu na'e tirna xy —sei ny fi mi ca lo djedi cu lacri cusku— .i .ei da noroi tirna lo xrula .i .ei da xy catlu gi'e sumne .i lo memimoi cu clugau lo mi terdi lo titla panci .i ku'i mi pu na se pluka .i lo lisri be lo jgalu be'o noi tai fanza mi cu .ei mi cnigau li'u»

ni'o ny za'o lacri cusku «lu mi pu na snada lo nu jimpe .i .ei mi pajni ji'u lo se zukte .enai lo valsi .i iu xy mi panci clugau gi'e te gusni .i .u'u .eisai mi na cliva .i .ei mi smadi fi lo nu xy xendo poi se mipri fo lo nu xy tcica .i .oi lo xrula cu tai natfe tarti .i ku'i mi dukse lo ka citno kei lo nu djuno kakne lo nu prami xy li'u»

ni'o ni'o so mo'o

ni'o pe'i ny se prali lo nu cliva kei lo nu lo so'o cilce cipni cu zdacne .i ca lo nuncliva cerni ny gasnu lo nu lo ny terdi cu mulno cnici .i ny kurji pumlumci lo cikna je'erma'a .i ny ponse re je'erma'a poi cikna zi'e noi xamgu se pilno fi lo nu glagau lo cerni sanmi .i ny ponse pa cando je'erma'a ku ji'a .i ku'i cu'u ny da noroi djuno .iseki'ubo ny pumlumci lo cando je'erma'a ku ji'a .i lo je'erma'a va'o lo nu drani pumlumci cu di'i tolvlile jelca secau lo nu jetce .i lo je'erma'a nu jetce cu simsa lo damtubnu fagri .i li'a bu'u lo mi'o terdi mi'o dukse lo ka cmalu kei lo nu ka'e pumlumci lo je'erma'a .iseki'ubo jy mutce lo ka jai raktu mi'o

ni'o ji'a ny vimcu fau lo nu milxe badri kei lo romoi be lo tricrbaobao co'arbanro .i ny krici lo du'u ny ba noroi xruti .i ku'i ro lo slabu se gunka cu simlu ca lo ca cerni lo ka mutce lo ka titla .i ny ca lo nu ny lo xrula rore'u jaursabji gi'e pu'o setca lo blacygai cu sanji lo nu djica lo nu klaku

— .i co'o —sei ny fi lo xrula cu cusku

ni'o ku'i xy na spusku

— .i co'o —sei ny krefu cusku

ni'o lo xrula cu kafke .i ku'i na se rinka lo nu xy bilma

— .i mi pu bebna —sei xy za cusku— .i ko mi fraxu .i ko troci lo nu do gleki

ni'o ny se spaji lo nu claxu lo nu vlasfa .i ny stali fau lo nu mulno se cfipu gi'e jgari lo blacygai .i ny na jimpe fi lo vi tolvlile cando

— .i je'u mi do prami —sei lo xrula fi ny cusku— .i do pu djuno noda fi'o fuzme mi .i nasai vajni .i ku'i do mi dunli lo ka bebna .i ko troci lo nu do gleki .i ko toljgari lo blacygai .i mi na za'o djica tu'a by

— .i ku'i lo brife .y

— .i mi na tai bilma .i lo nicte ke vifne vacri ba xamgu mi .i mi xrula

— .i ku'i lo danlu .y

— .i .ei mi renvi tu'a reji'ici ciftoldi va'o lo nu mi djica lo nu se slabu lo toldi .i ti'e tai melbi .i va'onaiku ma mi ba vitke .i do ba darno .i lo barda danlu zo'u mi na terpa .i mi se jgalu

ni'o xy sapru'i jarco lo vo kinli .ibabo xy jmina cusku di'e

— .i .oi ko na tai stali .i do ba'o jdice lo du'u do cliva .i ko klama

ni'o ki'ubo xy na djica lo nu ny viska lo nu xy klaku .i xy tai jgira xrula

ni'o ni'o pano mo'o

ni'o ny zvati lo kensa be lo plinycma po'u li 325 jo'u li 326 jo'u li 327 jo'u li 328 jo'u li 329 jo'u li 330 .i seki'ubo pamai ny vitke fi py tezu'e lo nu zukte da gi'e cilre

ni'o lo pamoi cu se xabju lo nolraitru .i lo nolraitru cu zutse fi'o se dasni lo zirpu jo'u .ermine lo ritli stizu noi sampu jeku'i banli

— .i .a'e lo se turni —sei lo nolraitru ca lo nu ny viska lo cmalu noltru cu krixa cusku

ni'o lo cmalu noltru cu preti cusku fi vo'a fe «lu ta'i ma tu ka'e djuno fi mi va'o lo nu tu mi pu noroi viska li'u»

ni'o ny na djuno lo du'u ga'a lo nolraitru lo munje cu sampu mutce .i ro remna cu ga'a se turni

— .i ko jbikla tezu'e lo nu mi do semau viska —sei lo nolraitru noi mutce jgira lo nu uo nolraitru da cu cusku

ni'o lo cmalu noltru cu kanla sisku lo se zutse .iku'i lo plini cu culno lo banli ke .ermine kosta .iseki'ubo ny sanli stali .i ny ri'a lo nu tatpi cu sipfru

— .i ga'i lo nu sipfru cu naldrani nu tarti va'o lo nu lo nolraitru cu zvati —sei lo nolraitru cu cusku— .i mi tolcurmi la'e di'u

— .i mi ka'enai fanta —sei lo cmalu noltru cu spuda cusku— .i mi puze'a klama gi'enai sipna

— .iseki'ubo —sei lo nolraitru fi ny cusku— mi do minde lo nu do sipfru .i mi ze'u lo nanca be li so'i na zgana lo nu da sipfru .i lo nu sipfru cu rirci cinri mi .i .o'ocu'i ko za'ure'u sipfru .i mi minde

— .i la'e di'u se xanka mi .i mi na kakne lo nu ranji —sei lo cmalu noltru cu xunre binxo

— .i .o'ucu'i —sei lo nolraitru cu spuda— .i .i'a mi do minde lo nu do ga sipfru ginai sipfru

ni'o ny milxe lo ka fi'usku kei gi'e simlu lo ka se fanza

ni'o lo nolraitru cu se vajni lo nu da sinma lo nu ny catni .i ny na renvi lo nu toltinbe .i ny traji lo ka turni .i ku'i ki'u lo nu ny mutce lo ka xendo cu minde fi lo racli

ni'o «lu va'o lo nu mi minde —sei ny ta'e cusku— .i va'o lo nu ge mi minde lo jatna lo nu binxo lo xamsi cipni gi jy na tinbe cu fuzme fa jy na.e mi li'u»

— .i .e'apei mi zutse —sei lo cmalu noltru cu toldarsi retsku

— .i mi do minde lo nu do zutse —sei lo nolraitru noi nobli crepu lo pagbu be lo ny rankre kosta cu spusku

ni'o ku'i lo cmalu noltru cu se spaji .i lo plini cu cmatcetce .i lo nolraitru cu ka'e turni ma

— .i doi nobli —sei cyny fi ny cusku— ko mi fraxu lo nu mi retsku fi do

— .i mi do minde lo nu do retsku fi mi —sei lo nolraitru zi sutra cusku

— .i doi nobli .y do turni ma

— .i roda —sei lo nolraitru sekai lo ka mutce sampu cu spusku

— .i xu roda

ni'o lo nolraitru cu sampu farja'o lo ny plini .e lo drata plini .e lo tarci

— .i xu turni ro tu —sei lo cmalu noltru cu cusku

— .i turni ro tu —sei lo nolraitru cu spusku

ni'o ny turni co traji po'onai je mujyku'e ji'a

— .i xu lo tarci cu tinbe fi do

— .i li'a go'i —sei lo nolraitru cu cusku— .i ty zi tinbe .i mi na renvi lo nu toltinbe

ni'o lo tai nu vlipa cu se manci lo cmalu noltru .i ri va'o lo nu da'i tai vlipa cu kakne lo nu zvati vovo po'onai solri nu canci .a zereboi ji'a sy .a panonoboi ji'asai sy .a renonoboi ji'acai solri nu canci kei ca pa djedi gi'e noroi bevri lo stizu .i ny mu'i lo nu milxe badri lo nu morji lo ny se cliva ke cmalu plini cu darsi lo nu cpedu lo se dunda lo nolraitru

— .i mi djica lo nu viska lo solri nu canci .i .e'o io ko minde lo solri lo nu canci

— .i va'o lo nu da'i ge mi minde lo jatna lo nu vofli klama lo xrula lo drata tai tu'a lo toldi kei .a lo nu finti lo draci kei .a lo nu binxo lo xamsi cipni gi jy na tinbe lo te minde zo'u jy ji mi fuzme srera

— .i do go'i —sei lo cmalu noltru cu jdari cusku

— .i drani .i .ei da mi'ecpe fi rode fe lo se kakne be de —sei lo nolraitru di'a cusku— .i lo nu catni cu ralju se jicmu lo nu racli .i va'o lo nu do minde lo do prenu lo nu plipe lo xamsi cu ba catni fapro fa py .i mi lo nu mi'ecpe lo nu tinbe cu zifre ki'u lo nu mi racli minde

— no'i lo mi solri nu canci cu mo —sei lo cmalu noltru noi noroi tolmorji fi lo preti ca lo nu ba'o cusku cu mojgau

— .i lo do solri nu canci zo'u do ba lifri .i mi ba mi'ecpe .i ku'i mi ba denpa ji'u lo mi turni saske lo nu lo vanbi cu mapti

— .i la'e di'u cabna ma —sei lo cmalu noltru cu djuno cpedu

— .i .y .y —sei lo nolraitru noi ca'o tadni lo barda veldetri cu spusku— .y .y cabna .y .y lo zi vanci ti'u li ji'i ze pi'e vono .i do ba zgana lo nu mi ja'asai te tinbe

ni'o lo cmalu noltru cu sipfru .i ny xenru tu'a lo ny se claxu ke solri nu canci .iji'a ny xa'o milxe lo ka se tolzdile

— .i .einai mi vi zukte —sei ny fi lo nolraitru cu cusku— .i .ai mi cliva

— .i ko na cliva —sei lo nolraitru noi tai jgari lo nu turni da cu spusku— .i ko na cliva .i ca'e do raljitro

— .i raljitro ma

— .i .y lo nu pajni

— .i ku'i no prenu vi ka'e se pajni

— .i na djuno —sei lo nolraitru cu cusku— .i mi za'o na kuspe litru lo mi tutra .i mi dukse lo ka tolcitno .i mi claxu lo canlu be lo nobli carce .i mi tatpi lo nu cadzu

— .i .a'i mi ba'o catlu —sei lo cmalu noltru noi salpo binxo tezu'e lo nu za'ure'u zgana lo drata mlana be lo plini cu cusku— .i noda zvati tu ji'a

— .iseva'obo do do ba pajni —sei lo nolraitru cu spusku— .i traji lo ka nandu .i lo sevzi lo drata cu mutce zmadu lo ka nandu fa lo nu pajni ce'u .i lo nu do snada lo nu do do pajni cu jarco lo nu do ca'a prije

— .i mi —sei lo cmalu noltru cu cusku— cu kakne lo nu mi mi pajni bu'u makau .i mi na nitcu lo nu xabju ti

— .i .y .y —sei lo nolraitru cu cusku— mi birti lo du'u lo tolcitno ratcu cu diklo da lo mi terdi .i mi tirna ry ca lo nicte .i do ka'e pajni lo tolcitno ratcu .i do ry di'inai dapma lo nu mrobi'o .i taiku lo nu ry jmive cu ba jalge lo nu do pajni .i ku'i do ry ba roroi fraxu ki'u lo nu .ei na xaksu ry .i ry papo'omei

— .i mi —sei lo cmalu noltru cu spusku— na nelci lo nu mi dapma fi lo nu mrobi'o .iji'a mi birti lo du'u mi cliva

— .i ko na co'e —sei lo nolraitru cu cusku

ni'o ku'i lo cmalu noltru noi bredi lo nu cliva cu na djica lo nu drigau lo tolcitno turni

— .i lo banli nobli va'o lo nu djica lo nu satci se tinbe cu .ei minde mi lo racli .i mu'a ny mi minde lo nu mi cliva pu lo mo'u mentu .i lo vanbi cu simlu lo ka ca mapti

ni'o lo nolraitru cu spusku noda .iseki'ubo lo cmalu noltru cu ze'i senpi .ibazibo fau lo nu cnivasxu cu cliva

— .i ca'e do mi jansu —sei lo nolraitru cu sutra ki'asku

ni'o ny catni mutce simlu

ni'o «lu lo makcu prenu cu cizra mutce li'u» se cusku lo cmalu noltru ri ca lo nu litru

ni'o ni'o papa mo'o

ni'o lo remoi plini cu se xabju lo sezyjgidu'e

— .i .a'e lo sinma be mi mi vitke —sei lo sezyjgidu'e ca lo nu co'a viska lo cmalu noltru cu vu krixa cusku

ni'o ga'a lo sezyjgidu'e ro drata remna cu sinma sy

— .i coi do'u —sei lo cmalu noltru cu cusku— .i do dasni lo cizra mapku

— .i ti tutci lo nu mi rinsa —sei lo sezyjgidu'e cu spusku— .i ti tutci lo nu mi rinsa ca lo nu mi se ki'arzau .i ku'i uinai noroiku da vi litru

— .i .a'a —sei lo cmalu noltru noi na jimpe cu cusku

— .i ko jalsimgau lo do xance —sei lo sezyjgidu'e cu stidi

ni'o lo cmalu noltru cu jalsimgau lo xance .i lo sezyjgidu'e cu cunlo rinsa fau lo nu lafti lo mapku

ni'o «lu ta zdimau lo nu vitke lo nolraitru li'u» se sezysku lo cmalu noltru .i ny di'a ca'o jalsimgau lo xance .i lo sezyjgidu'e di'a rinsa fau lo nu lafti lo mapku

ni'o baza lo mentu be li mu be'o noi nu zajba cu tatpi fa lo cmalu noltru lo stodi nu kelci

— .i pau lo nu lo mapku cu farlu —sei ny preti cusku— cu se sarcu ma

ni'o ku'i lo sezyjgidu'e na tirna .i lo sezyjgidu'e noroi tirna na'ebo lo si'avla

— .i xu do mi ja'asai mutce sinma —sei sy fi lo cmalu noltru cu preti cusku

— .i ma smuni zo sinma

— .i zo sinma cu se smuni lo du'u zgana lo nu mi traji lo ka melbi .e lo ka zabna dasni .e lo ka ricfu mutce .e lo ka tolbebna kei fo lo se terdi

— .i ku'i ue do nonkansa lo nu se terdi

— .i .e'osai ko mi sinma va'o makau

— .i mi do sinma —sei lo cmalu noltru fau lo nu milxe lafti lo janco cu cusku— .i ku'i ma prali do la'e di'u

ni'o lo cmalu noltru cu cliva

ni'o «lu lo makcu prenu ja'a cizra mutce li'u» se cusku lo cmalu noltru ri ca lo nu litru

ni'o ni'o pare mo'o

ni'o lo za'umoi plini cu se xabju lo pixydu'e .i lo nu vitke cu tordu gi'eku'i rinka lo nu lo cmalu noltru cu mutce lo ka badri

— .i do va zukte ma —sei ny fi lo pixydu'e noi smaji crane lo kunti botpi .e lo culno botpi cu cusku

— .i mi pinxe —sei lo pixydu'e fau lo nu badri simsa cu spusku

— .i tezu'e ma do pinxe —sei lo cmalu noltru cu retsku

— .i tezu'e lo nu mi tolmorji —sei lo pixydu'e cu spusku

— .i tolmorji ma —sei lo cmalu noltru noi xa'o kecti py cu retsku

— .i tolmorji lo du'u mi ckeji —sei lo pixydu'e fau lo nu dizgau lo stedu cu zungi cusku

— .i ckeji ma —sei lo cmalu noltru noi djica lo nu sidju cu datni cpedu

— .i ckeji lo nu mi pinxe —sei lo pixydu'e noi co'a stodi smaji cu famsku

ni'o lo cmalu noltru cu se cfipu cliva

ni'o «lu lo makcu prenu ja'asai cizra mutce li'u» se cusku lo cmalu noltru ri ca lo nu litru

ni'o ni'o paci mo'o

ni'o lo vomoi plini cu terdi lo cu'upre .i lo nanmu cu tai ca'o gunka ja'e ji'asai lo nu ri na lafti lo stedu ca lo nu lo cmalu noltru cu tolcliva

— .i coi do'u —sei ny fi cy cusku— .i lo do sigja ba'o naljelbi'o

— .i li ci li re te sumji li mu .i li mu li ze li pare .i li pare li ci li pamu .i coi do'u .i li pamu li ze li rere .i li rere li xa li rebi .i claxu lo temci pe lo nu za'ure'u jelgau .i li rexa li mu li cipa .i uo sumji fa li munopaki'o xarereki'o zecipa

— .i munopaki'oki'o mo

— .i ua do za'o xu zvati .i munopaki'oki'o .y .i mi na za'o djuno .i .ei mi gunka lo tai mutce .i mi junri .i mi na se zdile lo xalbo .i li re li mu li ze .i .y

— .i munopaki'oki'o mo —sei lo cmalu noltru noi noroi lo nu jmive cu sisti tu'a lo preti ca lo nu ba'o cusku py cu za'ure'u cusku

ni'o lo cu'upre cu lafti lo stedu

— .i mi ze'a lo nanca be li muvo be'o poi nu mi xabju lo vi plini cu cipo'oroi se dicra .i lo pamoi cu fasnu pu za lo nanca be li rere gau lo cakcinki noi lo cevni ku po'o cu djuno lo du'u ke'a farlu fi makau .i cy se sance lo rigni savru .ibo mi voroi srera lo nu sumji kanji .i lo remoi cu fasnu puza lo nanca be li papa ri'a lo nu mi sluji bilma .i mi pime'irauroi zajba .i mi claxu lo temci pe lo nu cunso cadzu .i mi junri .i lo cimoi .y cu fasnu caku .i no'i li munopaki'o .y

— .i munopaki'oki'o mo

ni'o lo cu'upre cu jimpe lo du'u li no te pacna lo nu smaji

— .i munopaki'oki'o cmalu dacti poi su'oroi se viska fi lo tsani

— .i xu lo sfani

— .i na go'i .i lo cmalu dacti poi carmi

— .i xu lo bifce

— .i na go'i .i lo cmalu ke sloskari dacti poi gasnu lo nu lo tolgunka cu ciksenva .i ku'i mi junri .i mi claxu lo temci pe lo nu ciksenva

— .i ua lo tarci xu

— .i drani .i lo tarci

— .i do mo munopaki'oki'o tarci

— .i munopaki'o xarereki'o zecipa tarci .i mi junri .i mi satci cusku

— .i do mo lo tarci

— .i ke'upei mi mo ty

— .i go'i

— .i sa'u mi ty ponse

— .i xu do ponse lo tarci

— .i go'i

— .i ku'i mi pu zgana lo nolraitru noi ...

— .i lo nolraitru cu ponse nagi'e turni .i mutce frica

— .i ma do prali lo nu do ponse lo tarci

— .i prali mi fa lo nu mi ricfu

— .i ma do prali lo nu do ricfu

— .i lo nu mi te vecnu lo drata tarci va'o lo nu da tolcri ty

ni'o «lu tu —sei lo cmalu noltru fi ri cusku— cu milxe simsa lo mi pixydu'e lo ka ce'u pensi ta'i makau li'u»

ni'o ku'i ny za'o preti cusku

— .i da ka'e ponse lo tarci ma

— .i ma ponse ty —sei lo cu'upre fau lo nu fengu cu spusku

— .i mi na djuno .i noda go'e

— .i seki'ubo mi ponse ty lo nu mi pamoi lo pensi be la'e di'u

— .i xu la'e di'u banzu

— .i li'a go'i .i va'o lo nu do tolcri lo tabykrili poi noda ke'a ponse zo'u do ty ponse .i va'o lo nu do stufa'i lo daplu poi noda ke'a ponse zo'u do dy ponse .i va'o lo nu do pamoi lo te sidbo be fi da gi'e rejgau zo'u do ponse da .i mi ponse lo tarci lo nu no prenu pu tu'a mi cu pacna lo nu ponse ty

— .i la'e di'u jetnu —sei lo cmalu noltru cu cusku— .i do ty mo

— .i mi ty jitro .i mi ty kancu gi'e za'ure'u kancu —sei lo cu'upre cu cusku— .i nandu .i ku'i mi junri

ni'o lo cmalu noltru za'o na se mansa

— .i va'o lo nu mi ponse lo nebyta'u zo'u mi kakne lo nu mi ny punji lo sruri be lo cnebo gi'e dasni .i va'o lo nu mi ponse lo xrula zo'u mi kakne lo nu mi xy crepu gi'e bevri .i ku'i do na kakne lo nu do crepu lo tarci

— .i na go'i .i ku'i mi kakne lo nu gau mi sorcu ty lo banxa

— .i ma smuni di'u

— .i smuni fa lo du'u ge mi ciska lo te kancu be lo tarci lo cmalu pelji gibabo mi setca lo pelji lo se stela dacru

— .i xu mulno

— .i banzu

ni'o «lu zdile —sei lo cmalu noltru cu pensi— .i pemci tarti .i ku'i na junri mutce li'u»

ni'o lo cmalu noltru cu mutce frica lo makcu prenu lo ka makau sidbo lo se junri ce'u

— .i mi —sei ny di'a cusku— cu ponse lo xrula noi mi jaursabji ke'a ca ro djedi .i mi ponse lo ci je'erma'a noi mi derlumci ke'a ca ro jeftu .i mi derlumci lo paboi jy poi cando ku'o ji'a .i da noroi djuno .i prali lo mi je'erma'a .e lo mi xrula lo nu mi ponse .i ku'i na prali lo tarci tu'a do

ni'o lo cu'upre cu kargau lo moklu gi'eku'i pensi noda poi spusku ke'a .i lo cmalu noltru cu cliva

ni'o «lu lo makcu prenu ja'asai cizra mutce li'u» se cusku lo cmalu noltru ri ca lo nu litru

ni'o ni'o pavo mo'o

ni'o lo mumoi plini cu mutce lo ka cizra .i py cmalu traji fo lo romei .i lo canlu cu satci banzu lo nu canlu lo gubni tergusni joi lo tergusni cikygau .i lo cmalu noltru na snada lo nu jimpe lo du'u makau prali bu'u lo pagbu be lo kensa bu'u lo plini noi claxu lo zdani .e lo se xabju ku'o fi lo gubni tergusni .e lo tergusni cikygau .i ku'i ny fi ny cusku fe di'e

ni'o «lu ju'ocu'i lo vu nanmu cu tolracli .i ku'i tu mleca lo nolraitru .e lo sezyjgidu'e .e lo cu'upre .e lo pixydu'e lo ka tolracli .i lo jibri be tu cu se smuni do'anai .i lo nu tu cikygau lo tergusni cu panra lo nu jbegau lo cnino tarci .a lo xrula .i lo nu tu cadgau lo tergusni cu sipri'a lo tarci .a lo xrula .i lo jibri cu melbi .i jy te prali je'u ki'u lo nu jy melbi li'u»

ni'o ny ca lo nu tolcliva lo plini cu sinma rinsa lo cikygau

— .i coi do'u .i ki'u ma do puzi cadgau lo do tergusni

— .i lo javni —sei lo cikygau cu spusku— .i ko cerni zanfri

— .i ma se javni

— .i lo nu cadgau lo mi tergusni .i ko vanci zanfri

ni'o cy boi za'ure'u cikygau ty

— .i ku'i ki'u ma do puzi za'ure'u cikygau ta

— .i lo javni —sei lo cikygau cu spusku

— .i mi na jimpe —sei lo cmalu noltru cu cusku

— .i .einai jimpe da —sei lo cikygau cu cusku— .i lo javni cu javni .i ko cerni zanfri

ni'o cy cadgau lo cy tergusni

ni'o baku cy sudgau lo mebri sepi'o lo xunre kurfa boxfo

— .i mi gunka lo malnandu .i puzu racli .i mi pu cadgau ca lo cerni gi'e cikygau ca lo vanci .i mi surla ze'a lo donri velvi'u gi'e sipna ze'a lo nicte velvi'u

— .i xu ba la'e di'u lo javni ba'o cenba

— .i lo javni na cenba —sei lo cikygau cu cusku— .i la'e di'u sa'e nabmi .i lo plini ca'o lo nanca cu zenba lo ka sutra fa lo nu carna .ije lo javni na cenba

— .i ni'i mo —sei lo cmalu noltru cu cusku

— .i ni'iku caku py mulcarna paroi ro mentu .ije mi claxu lo nu surla poi snidu be li pa ji'asai .i mi cikygau gi'e cadgau paroi ro mentu

— .i .u'i lo djedi cu mentu bu'u lo medomoi

— .i .u'inaisai —sei lo cikygau cu cusku— .i mi'o ba'o tavla simxu ze'a lo masti

— .i xu lo masti

— .i go'i .i lo mentu be li cino .i va'i lo djedi be li cino .i ko vanci zanfri

ni'o cy boi za'ure'u cikygau lo cy tergusni

ni'o lo cmalu noltru cu catlu gi'e nelci lo cikygau noi tai bigysi'a lo javni .i ny morji fi lo solri nu canci noi ny pu ta'e sisku ta'i lo nu bevri lo ny stizu .i ny djica lo nu sidju lo ny pendo

— .i .e'u .i mi se slabu lo tadji be lo nu do surla ca lo nu do djica

— .i mi roroi djica —sei lo cikygau cu cusku

ni'o je'u da ka'e bigysi'a je lazni

ni'o lo cmalu noltru di'a cusku

— .i lo do plini tai cmalu ja'e lo nu do ka'e sruri py fau ci nu stapa .i lo nu do masno cadzu cu banzu lo nu do ze'e stali lo solri mlana .i do ca lo nu do djica lo nu surla cu cadzu .i lo donri ba ranji lo do se djica

— .i prali mi la'e di'u fa na'ebo lo mutce —sei lo cikygau cu cusku— .i lo pukrai be mi cu nu sipna

— .i na zanfunca —sei lo cmalu noltru cu cusku

— .i na zanfunca —sei lo cikygau cu cusku— .i ko cerni zanfri

ni'o cy cadgau lo cy tergusni

ni'o «lu tu —sei lo cmalu noltru fi vo'a ca lo nu ca'o litru cu cusku— tu so'emu'ei se tolsinma ro lo drata no'u lo nolraitru .e lo sezyjgidu'e .e lo pixydu'e .e lo cu'upre .i ku'i tu se steci lo ka na simlu fi mi fe lo ka se ckasu kakne .i ju'ocu'i la'e di'u se mukti lo nu tu se cuntu tu'a lo na'e sevzi be vo'a li'u»

ni'o ny cnivasxu gi'e di'a cusku di'e fi ny

ni'o «lu tu se steci lo ka mi ka'e pendo ce'u .i ku'i lo tu plini cu dukse lo ka cmalu .i claxu lo canlu be lo remei li'u»

ni'o lo cmalu noltru na darsi lo nu ny juncru ny lo du'u ny xenru lo nu pu cliva lo vi se zandimna plini kei mu'i lo paki'ovovono solri nu canci pe ro cacra be li revo

ni'o ni'o pamu mo'o

ni'o lo xamoi plini cu dekto fi lo ka barda .i py se xabju lo tolci'o nanmu poi ciska fi lo bratce cukta

— .i ua .a'e lo tumfakli'u —sei ny ca lo nu co'a viska lo cmalu noltru cu krixa cusku

ni'o lo cmalu noltru cu tsebi'o lo jubme gi'e milxe ke surla vasxu .i uo ny xa'o mutce litru

— .i do klama fi ma —sei lo tolci'o nanmu cu cusku

— .i lo rotsu cukta cu mo —sei lo cmalu noltru cu cusku— .i do vi zukte ma

— .i mi tedyskepre —sei lo tolci'o nanmu cu cusku

— .i lo tedyskepre cu mo

— .i prije certu lo nu djuno lo du'u makau se stuzi lo xamsi .e lo rirxe .e lo tcadu .e lo cmana .e lo kutytu'a

— .i mutce cinri —sei lo cmalu noltru cu cusku— .i ui uo lo fatci se jibri

ni'o ny sruri catlu lo plini pe lo tedyskepre .i ny pu noroi viska lo tai banli plini

— .i lo do plini cu melbi mutce .i xu da xamsi py

— .i mi na ka'e djuno —sei lo tedyskepre cu cusku

— .i ua —sei lo cmalu noltru cu tolmanci— .i xu cmana py

— .i mi na ka'e djuno —sei lo tedyskepre cu cusku

— .i xu tcadu .i xu rirxe .i xu kutytu'a

— .i ji'a mi na ka'e djuno —sei lo tedyskepre cu cusku

— .i ue ku'i do tedyskepre

— .i satci —sei lo tedyskepre cu cusku— .i ku'i mi na tumfakli'u .i mi ja'asai claxu lo tumfakli'u .i lo tedyskepre na vi je vu kancu lo tcadu .e lo rirxe .e lo cmana .e lo xamsi .e lo kutytu'a .i lo tedyskepre cu dukse lo ka vajni kei lo nu xalbo litru .i ty na cliva lo ty briju .i ku'i by te vitke ty lo tumfakli'u .i lo tedyskepre cu te preti fo lo tumfakli'u gi'e rejgau fi lo ri se morji .i va'o lo nu lo se morji be pa lo tumfakli'u cu simlu lo ka cinri zo'u lo tedyskepre cu gasnu lo nu da lanli lo marde be lo tumfakli'u

— .i ma krinu la'e di'u

— .iki'ubo lo tumfakli'u poi jitfa cusku cu betri lo tedyske .i ji'a go'i fa lo tumfakli'u poi pixydu'e

— .i ma krinu la'e di'u —sei lo cmalu noltru cu cusku

— .iki'ubo lo pixydu'e cu remei viska .iseki'ubo lo tedyskepre cu rejgau fo lo cmana remei seba'i lo cmana pamei

— .i mi se slabu da —sei lo cmalu noltru cu cusku— poi da'i mabla lo ka tumfakli'u

— .i la'e di'u cumki .i no'i va'o lo nu lo marde be lo tumfakli'u cu simlu lo ka xamgu zo'u da lanli lo se tumfakli'u be ty

— .i xu da klama tezu'e lo nu viska

— .i na go'i .i pluja dukse .i ku'i da ca'icpe fi lo tumfakli'u lo nu ty dunda lo ve jinvi .i mu'a va'o lo nu srana lo barda cmana zo'u da ca'icpe lo nu bevri lo barda rokci da

ni'o lo tedyskepre cu suksa cinmo

— .i ku'i do klama fi lo darno .i do tumfakli'u .i do ba skicu lo do plini mi

ni'o lo tedyskepre ca lo nu ba'o kargau lo ty reicku cu kilgau lo ty pinsi .i pamai da ciska lo nuzba be fi lo tumfakli'u fo lo pinsi .i da denpa lo nu lo tumfakli'u cu dunda lo ve jinvi kei fo lo nu xinmo ciska

— .i re'i —sei lo tedyskepre cu cusku

— .i .a'e bu'u lo mi zdani —sei lo cmalu noltru cu cusku— na cinri mutce .ibo roda cu cmalu .i mi ponse ci je'erma'a .i go'i re cikna je'erma'a .e pa cando je'erma'a .i ku'i da noroi djuno

— .i da noroi djuno —sei lo tedyskepre cu cusku

— .i mi ponse lo xrula ku ji'a

— .i mi'a na rejgau fo lo xrula —sei lo tedyskepre cu cusku

— .i ma krinu .i xy traji lo ka melbi

— .i krinu fa lo nu lo xrula cu zasni

— .i ma smuni zo zasni

— .i lo tedyskecku —sei lo tedyskepre cu cusku— cu traji lo ka makau vamji ce'u kei fo lo ro cukta .i ty noroi purci datni binxo .i rirci mutce fa lo nu lo cmana cu cenba lo ka stuzi .i rirci mutce fa lo nu lo xamsi cu toltisna lo xy djacu .i mi'a ciska lo srana be lo vitno

— .i ku'i lo cando je'erma'a ka'e cikna binxo —sei lo cmalu noltru cu dicra— .i ma smuni zo zasni

— .i lo du'u lo je'erma'a cu cando gi'ikau cikna cu na vajni mi'a —sei lo tedyskepre cu cusku— .i vajni mi'a fa lo cmana .i cy na cenba

— .i ku'i ma smuni zo zasni —sei lo cmalu noltru noi noroi lo nu jmive cu sisti tu'a lo preti ca lo nu ba'o cusku py cu za'ure'u cusku

— .i smuni fa lo du'u da se ckape lo nu da zi canci

— .i xu lo mi xrula cu se ckape lo nu xy zi canci

— .i li'a go'i

ni'o «lu lo mi xrula cu zasni —sei lo cmalu noltru fi ny cu cusku— .ije xy ponse vo kinli po'o tepi'o lo nu bandu xy lo munje .ije mi cliva xy ja'e lo nu xy nonkansa bu'u lo mi zdani li'u»

ni'o la'e di'u pamoi lo nu ny xenru cinmo .i ku'i ny za'ure'u virnu binxo

— .i do stidi lo nu mi vitke fi ma kei mi —sei ny preti cusku

— .i lo plini po'u la .terd. —sei lo tedyskepre cu spuda— .i ty zabna misno

ni'o lo cmalu noltru cu cliva fau lo nu senva lo ny xrula

ni'o ni'o paxa mo'o

ni'o lo zemoi plini cu du la .terd.

ni'o la .terd. na fadni fi lo plini .i ty vasru papapa nolraitru (to li'a na tolmorji fi lo xekri nolraitru toi) .e ze ki'o tedyskepre .e sonono ki'o cu'upre .e ze ki'o munono ki'o pixydu'e .e cipapa ki'o ki'o sezyjgidu'e .i va'i vasru ji'i re ki'o ki'o ki'o makcu prenu

ni'o tezu'e lo nu dunda lo sidbo be lo du'u la .terd. cu barda sela'u makau cu cusku fa mi lo sedu'u pu lo nu lo dikca cu se finti cu sarcu ve'a lo xa bratumla fa lo se sonci be voxare ki'o mupapa tergu'i cikygau

ni'o ri'a la'e di'u lo banli cu jvinu fi lo darno .i lo nu muvdu pe lo se sonci cu se javni tai tu'a lo me lo dansu bende moi .i pamoi fa lo tergu'i cikygau pe lo nuzlo joi lo sralo .i ba bo cy ca lo nu ba'o cikygau lo cy tergu'i cu sipna .i babo nerkla ca lo vo'a krefu lo nu dansu kei fa lo tergu'i cikygau pe lo jungo joi lo gugdrsiberi .i ba bo cy ji'a canci ti'a lo murta .i ba bo za'umoi fa lo tergu'i cikygau pe lo rusko joi lo xindo .i ba bo lo me lo friko joi lo ropno moi .i ba bo lo me lo ketco moi .i ba bo lo me lo bemro moi .i noroi lo cikygau pu srera lo nu porsi nerkla lo tsina .i pu banli

ni'o ge po'o lo cikygau be lo pa tergu'i pe lo berti jedjipno gi po'o lo cy kansa pe lo pa tergu'i pe lo snanu jedjipno cu lifri lo nu cando je surla jmive .i lo remei cu gunka reroi ro nanca

ni'o ni'o paze mo'o

ni'o lo nu djica lo nu zdile cu ta'e se jalge lo nu milxe jifsku .i mi na pu mutce lo ka stace do lo nu mi do tavla lo cikygau .i ckape fa lo nu mi sibgau lo jitfa lo mi'o terdi lo na se slabu be ty .i lo ro remna cu se canlu lo cmalu pe lo terdi sefta .i lo reki'oki'oki'o xabju be la .terd. va'o lo nu sanli gi'e milxe tagji tai tu'a lo nunjmaji cu frili mapti lo gubni panka poi clani minli li reno gi'e ganra minli li reno .i lo rolremymei ka'e se vasru lo cmarai daplu be fi la .pasifik.

ni'o li'a lo makcu prenu na krici la'e di'u .i py se xanri lo nu mutce canlu .i py jinvi lo du'u py vajni tai tu'a lo tricrbaobao .i .e'u do stidi lo du'u py kanji .i py neltce lo namcu .i la'e di'u pluka py .i ku'i ko na malpli lo do temci lo nu tai pensi .i na prali .i do lacri mi

ni'o lo cmalu noltru ca lo nu ba'o tolcliva lo terdi cu mutce se spaji lo nu viska no prenu .i ny co'a terpa lo nu srera tu'a lo plini kei ca lo nu lo lunra skari djine cu desku bu'u lo canre

— .i coi do'u —sei lo cmalu noltru cu cusku

— .i coi do'u —sei lo since cu cusku

— .i mi lo plini po'u ma ba'o farlu —sei lo cmalu noltru cu retsku

— .i la .terd. di'o lo friko —sei lo since cu spusku

— .i ua ja'o no prenu cu zvati la .terd.

— .i ti kutytu'a .i no prenu cu zvati lo kutytu'a .i la .terd. cu barda —sei lo since cu cusku

ni'o lo cmalu noltru cu tsebi'o lo rokci gi'e selfargau lo kanla lo tsani

— .i mi retsku fi mi —sei ny cusku— fe lo sedu'u xukau lo tarci cu se cikygau mu'i lo nu roda ka'e tolcri lo medamoi ca lo djedi .i ko catlu lo mi plini .i tu mi'o satci gapru .i ku'i .oi tu darno

— .i tu melbi —sei lo since cu cusku— .i do vi zukte fi ma

— .i mi se nabmi tu'a lo xrula —sei lo cmalu noltru cu cusku

— .i ua —sei lo since cu cusku

ni'o lo remei cu smaji

— .i lo remna cu zvati ma —sei lo cmalu noltru di'a cusku— .i da bu'u lo kutytu'a cu milxe lo ka nonkansa

— .i da nonkansa ne'a lo remna ji'a —sei lo since cu cusku

— .i do zdile danlu —sei ny cusku— .i do cinla tai tu'a lo degji

— .i ku'i mi vlimau lo degji be lo nolraitru —sei lo since cu cusku

ni'o lo cmalu noltru cu cisma

— .i do na mutce vlipa .i do na se tuple ji'asai .i do na ka'e litru ji'asai

— .i mi zmadu lo bloti lo ni ka'e bevri do lo darno —sei lo since cu cusku

ni'o sy srubi'o lo tupne'o be lo noltru tai tu'a lo solji djine

— .i lo se pencu be mi zo'u mi benji py lo dertu poi krasi py —sei sy za'o cusku— .i ku'i do curve gi'e klama fi lo tarci

ni'o lo cmalu noltru spuda noda

— .i mi do kecti .i do tai ralci bu'u lo vi rokci terdi .i mi kakne lo nu sidju du ca lo nu do dukse claxu lo do terdi .i mi kakne .y

— .i je'edo'u mi mulno jimpe —sei lo cmalu noltru cu cusku— .i ku'i ki'u ma do ta'e tavla sepi'o lo nabmi

— .i mi dafsabji ro boi ny —sei lo since cu cusku

ni'o lo remei cu smabi'o

ni'o ni'o pabi mo'o

ni'o lo cmalu noltru cu greli'u lo kutytu'a gi'e penmi lo xrula po'o .i lo xrula noi se pezli cida .i lo xrula noi tolvai

— .i coi do'u —sei lo noltru cu cusku

— .i coi do'u —sei lo xrula cu cusku

— .i lo remna ma zvati —sei lo cmalu noltru cu clite retsku

ni'o lo xrula pu paroi viska lo nu lo karvana zo'a klama

— .i lo remna xu .i zasti fa ji'i ze boi ry .i mi ry pu ganse za lo nanca be li so'o .i ku'i da noroi djuno lo du'u ry zvati makau .i lo brife ry muvgau .i ry claxu lo genja .i la'e di'u ry mutce fanza

— .i co'o do'u —sei lo cmalu noltru cu cusku

— .i co'o do'u —sei lo xrula cu cusku

ni'o ni'o paso mo'o

ni'o lo cmalu noltru cu cpare lo galtu cmana .i lo po'o cmana poi ze'e pu slabu ny cu me lo ci je'erma'a noi galtu dunli lo ny cidni .i ny pilno lo cando je'erma'a lo nu zutse .i «lu mi to'o lo cmana poi galtu tai ti —sei ny sezysku— cu ka'e viska piro lo terdi .e ro remna li'u» .i ku'i ny viska no na'e bo lo mutce kinli ke rokci jesni

— .i coi do'u —sei ny cipra cusku

— .i coi do'u coi do'u coi do'u —sei lo snaminra cu spuda

— .i do mo —sei lo cmalu noltru cu cusku

— .i do mo .i do mo .i do mo —sei lo snaminra cu spuda

— .i .e'o ko mi pendo .i mi nonkansa —sei ny cusku

— .i mi nonkansa .i mi nonkansa .i mi nonkansa —sei lo snaminra cu spuda

ni'o «lu cizra terdi —sei ny pensi— .i ty sudga gi'e kinli gi'e silna .i lo remna na se xanri .i ri ke'usku lo se cusku be da .i bu'u lo memimoi mi ponse lo xrula .i xy roroi pamoi cusku li'u»

ni'o ni'o reno mo'o

ni'o lo cmalu noltru ba lo nu ze'u litru lo canre .e lo rokci .e lo snime cu facki lo dargu uo .i ro dargu cu dargu lo remna

— .i coi do'u —sei ny cusku

ni'o ta xrula purdi fi lo preja pezli rozgu

— .i coi do'u —sei lei rozgu cu cusku

ni'o lo cmalu noltru ry catlu .i ro boi ry simsa lo ny xrula

— .i do mo —sei ny noi mutce spaji cu retsku fi ry

— .i mi rozgu —sei lei rozgu cu spusku

— .i ua —sei lo cmalu noltru cu cusku

ni'o ny mutce badri .i lo ny rozgu pu cusku lo du'u ry cu ropamei lo rozgu ve'e lo munje .i ue ti se zvati muki'o rozgu noi simsa ku'o bu'u pa po'o purdi

ni'o «lu ry ba mutce se fanza va'o lo nu da'i ry viska tu .i ry ba mutce kafke gi'e simlu lo ka pu'o mrobi'o kei tezu'e lo nu rivbi lo nu se ckasu .i mi ba bilga lo nu simlu lo ka kurji .iki'ubo va'o lo drata ry tezu'e lo nu culgau mi ji'a cu ba curmi lo nu ry ca'a mrobi'o li'u»

ni'o ny za'o sezysku «lu mi pu krici lo du'u mi ricfu lo ropamei xrula .i ku'i mi ponse lo po'o fadni rozgu .i go'i ri .e lo ci je'erma'a noi galtu dunli lo mi cidni zi'e noi ju'ocu'i pa ke'a ze'e ba cando .i va'o la'e di'u mi na banli noltru li'u» .i ny fau lo nu vreta lo srasu cu klaku

ni'o ni'o repa mo'o

ni'o caku tolcanci fa lo lorxu

— .i coi do'u —sei lo lorxu cu cusku

— .i coi do'u —sei lo cmalu noltru noi carna gi'e ku'i viska no da cu clite spuda

— .i mi vi zvati —sei lo voksa cu cusku— .i cnita lo plisytricu

— .i do mo —sei lo cmalu noltru cu cusku— .i do mutce melbi

— .i mi lorxu —sei lo lorxu cu cusku

— .i ko mi kansa lo nu kelci —sei lo cmalu noltru cu stidi— .i mi tai badri

— .i mi do ka'enai kansa lo nu kelci —sei lo lorxu cu cusku— .i mi na ba'o se tolcicygau

— .i ua .u'u —sei lo cmalu noltru cu cusku

ni'o ku'i ny ba lo nu pensi cu jmina cusku di'e

— .i ma smuni zo tolcicygau

— .i do na vi xabju —sei lo lorxu cu cusku— .i do ma sisku

— .i mi sisku lo remna —sei lo cmalu noltru cu cusku— .i ma smuni zo tolcicygau

— .i lo remna —sei lo lorxu cu cusku— cu ponse lo celxarci gi'e kalte .i mutce fanza .i ry ba'orgau lo jipci .i la'e di'u po'o ry cinri .i xu do sisku lo jipci

— .i na go'i —sei lo cmalu noltru cu cusku— .i mi sisku lo pendo .i ma smuni zo tolcicygau

— .i go'i fa lo mutce se tolmorji —sei lo lorxu cu cusku— .i smuni fa lo du'u zbasu lo te jorne

— .i «lu zbasu lo te jorne li'u» xu

— .i li'a —sei lo lorxu cu cusku— .i do ga'a mi za'o cmalu nanla po'o gi'e simsa panonoki'o cmalu nanla .i mi do na nitcu .i ji'a do mi na nitcu .i mi ga'a do lorxu po'o gi'e simsa panonoki'o lorxu .i ku'i mi'o va'o lo nu da'i do mi tolcicygau cu ba simxu lo ka nitcu .i do ba se steci ma'i mi fi lo munje zvati .i mi ba se steci ma'i do fi lo munje zvati

— .i mi co'a jimpe —sei lo cmalu noltru cu cusku— .i lo xrula zo'u pe'i xy mi pu ba'o tolcicygau

— .i cumki —sei lo lorxu cu cusku— .i la .terd. cu jai bu'u viska lo mutce vrici

— .i ue na go'e bu'u la .terd. —sei lo cmalu noltru cu cusku

ni'o lo lorxu cu simlu lo ka kucli

— .i xu bu'u lo drata terdi

— .i go'i

— .i xu lo kalte cu zvati lo di'u nai terdi

— .i na go'i

— .i ua .a'u .i xu lo jipci

— .i na go'i

— .i no da prane —sei lo lorxu cu dricmo

ni'o ku'i lo lorxu cu xruti lo ri sidbo

— .i lo mi nunjmive cu stodi .i mi kalte lo jipci .i lo remna mi kalte .i lo ro jipci cu simsa simxu .i lo ro remna cu simsa simxu .ija'ebo mi milxe se tolzdi .i ku'i lo mi nunjmive va'o lo nu da'i do mi tolcicygau cu ba solri se gusni simlu .i mi ba se slabu lo sance be lo nu stapa be'o poi frica ro drata .i lo drata nu stapa cu ba rinka lo nu mi nitkla lo tumloi .i lo medomoi cu ba rinka lo nu mi barkla lo kevzda tai tu'a lo zgike .i ji'a ko catlu .i xu do viska lo vu maxri foldi .i mi na citka lo nanba .i lo maxri mi nonselpli .i lo maxri foldi mi noda morjygau .i la'e di'u se badri .i ku'i do se kerfa lo se skari be lo solji .i seki'ubo ba manci ca lo nu do mi ba'o tolcicygau .i lo maxri noi se skari lo solji cu ba gasnu lo nu mi do pensi .i mi ba prami lo sance be lo brife be bu'u lo maxri

ni'o lo lorxu cu smabi'o gi'e ze'u catlu lo cmalu noltru

— .i .e'o ko mi tolcicygau —sei ly cusku

— .i .au go'i —sei lo cmalu noltru cu spusku— .i ku'i mi na ponse lo mutce temci .i .ei mi facki za'u pendo gi'e co'a se slabu so'i da

— .i da se slabu no na'ebo lo se tolcicygau be vo'a —sei lo lorxu cu cusku— .i lo remna na za'o ponse lo temci pe lo nu co'a se slabu da .i ry te vecnu lo mo'u se zbasu .i mu'igi na zasti fa lo vecnu be lo nu da pendo gi lo remna na za'o se pendo .i ganai do djica lo pendo gi .e'e ko mi tolcicygau

— .i .ei mi zukte ma —sei lo cmalu noltru cu cusku

— .i .ei denpa vrude —sei lo lorxu cu spuda— .i pamai do zutse lo srasu ki mi vu ru'e .i mi do catlu ra'i lo kojna be lo kanla .i do noda cusku .i lo bangu cu krasi lo nu jmisre .i ku'i ca ro djedi do ka'e zutse za lo milxe mleca

ni'o ca lo bavlamdei lo cmalu noltru cu xruti

— .i xagmau fa lo nu xruti ti'u lo mintu —sei lo lorxu cu cusku— .i va'ogi do tolcliva ti'u mu'a li paxa gi ti'u li pamu mi co'a gleki .i pa'a gi zenba lo ka makau tcika gi mi zenba lo ni gleki .i ti'u li paxa mi xa'o tolsurla je dunku .i mi facki lo du'u makau jdima lo nu gleki .i ku'i va'ogi do tolcliva ti'u lo cunso gi mi noroi djuno lo du'u .ei ti'u makau mi dasygau lo risna .i lo ritli cu sarcu

— .i lo ritli ki'a —sei lo cmalu noltru cu cusku

— .i ry ji'a dukse lo ka se tolmorji —sei lo lorxu cu cusku— .i ry rinka lo nu lo djedi cu frica lo drata djedi .i co'e lo cacra lo drata cacra .i mu'a ritli fi lo mi kalte lo nu dansu ca lo vondei fi'o kansa lo nixli pe lo tcadu .isemu'ibo lo vondei cu se manci djedi .i mi litru fe'eco'u lo vanjbafoi .i va'ogi da'i lo kalte ta'e dansu ca lo cunso gi ge lo djedi cu simsa simxu gi mi noroi zifre

ni'o tai la'e de'u lo cmalu noltru cu tolcicygau lo lorxu .i lo jai ca cliva cu jibni

— .i uinai —sei lo lorxu cu cusku— .i mi ba klaku

— .i do fuzme —sei lo cmalu noltru cu cusku— .i mi na pu djica lo nu do se xlali .i ku'i do pu djica lo nu mi do tolcicygau

— .i li'a —sei lo lorxu cu cusku

— .i ku'i ue do ba klaku —sei lo cmalu noltru cu cusku

— .i li'a —sei lo lorxu cu cusku

— .i ju'o noda do prali

— .i mi se prali —sei lo lorxu cu cusku— mu'i tu'a lo skari be lo maxri

ni'o baku ly jmina cusku

— .i ko klama gi'e rere'u catlu lei rozgu .i do ba jimpe lo du'u lo medomoi cu pamei bu'u lo munje .ibabo do xruti tezu'e lo nu tolrinsa mi .i mi ba dunda lo mipri do

ni'o lo cmalu noltru cu klama gi'e rere'u catlu lei rozgu

— .i do nasai simsa lo mi rozgu .i do za'o menoda .i no prenu do ba'o tolcicygau .ije do no prenu ba'o tolcicygau .i do ca ckaji tai lo nu lo mi lorxu pu ckaji .i ly pu na zmadu lo lorxu poi simsa panonoki'o drata .i ku'i mi ly mi pendygau .i ly pamei bu'u lo munje

ni'o lei rozgu cu se fanza

— .i do melbi .i ku'i do kunti —sei ny za'o cusku— .i lo prenu na morsi seva'u do .i .i'a lo mi rozgu zo'u lo da'i fadni ke pagre klama cu jinvi lo du'u ry do simsa .i ku'i ry po'o zmadu ro do lo ka vajni .iki'ubo ba'e ry zo'u mi ry jaursabji .iki'ubo ba'e ry zo'u mi ry punji lo cnita be lo blacygai .iki'ubo ba'e ry zo'u mi ry bandu sepi'o lo bifmarbi .iki'ubo ba'e ry zo'u mi catra lo ciftoldi (to .eji'anai lo reji'ici da poi ba binxo lo toldi toi) .iki'ubo ba'e ry zo'u mi tirna lo nu ry pante gi'e sezyzarsku gi'e ji'asai su'oroi smaji .iki'ubo ry memimoi lo rozgu

ni'o ny xruti lo lorxu

— .i co'o —sei ny cusku

— .i co'o —sei lo lorxu cu cusku— .i mi di'e mipri .i di'e sampu .i da xamgu ganse fi no na'ebo lo risna .i lo vajrai cu nonselji'u lo kanla

— .i lo vajrai cu nonselji'u lo kanla —sei lo cmalu noltru tezu'e lo nu morji cu fuksku

— .i lo temci poi do pu xaksu seva'u lo do rozgu cu rinka lo nu lo do rozgu cu tai vajni

— .i lo temci poi mi pu xaksu seva'u lo mi rozgu —sei lo cmalu noltru tezu'e lo nu morji cu co'e

— .i lo remna na za'o morji lo di'u jetnu —sei lo lorxu cu cusku— .i ku'i .ei do na tolmorji .i do co'a ze'eba fuzme roda poi do ba'o tolcicygau .i do fuzme lo do rozgu

— .i mi fuzme lo mi rozgu —sei lo cmalu noltru tezu'e lo nu morji cu fuksku

ni'o ni'o rere mo'o

— .i coi do'u—sei lo cmalu noltru cu cusku

— .i coi do'u—sei lo gartro cu cusku

— .i do bu'u zukte ma —sei lo cmalu noltru cu cusku

— .i mi ganzu lo litru lo ki'omei —sei lo gartro cu cusku— .i mi benji lo trene poi marce ly ku'o ga lo pritu gi lo zunle

ni'o lo selgu'i sutre'e noi cmoni tai lo lindi cu rinka lo nu lo troku'a cu desku

— .i tu sutydji —sei lo cmalu noltru cu cusku— .i tu ma sisku

— .i lo nanmu pe lo ve trene zo'u ny ji'asai na djuno —sei lo gartro cu cusku

ni'o cmoni klama fa'a lo dukti fa lo remoi ke selgu'i sutre'e

— .i xu tu xa'o xruti —sei lo cmalu noltru cu retsku

— .i tu na mintu —sei lo gartro cu cusku— .i nu canja

— .i xu tu na gleki bu'u lo pu se zvati be tu

— .i da noroi gleki bu'u lo se zvati be da —sei lo gartro cu cusku

ni'o cmoni fa lo lindi po'u lo cimoi ke selgu'i sutre'e

— .i xu tu jersi lo pamoi litru —sei lo cmalu noltru cu retsku

— .i tu jersi noda —sei lo gartro cu cusku— .i tu ne'i sipna .ija tu sipfru .i lo verba ku po'o cu catke lo nazbi re'o lo blaci

— .i lo verba ku po'o djuno lo du'u sisku makau —sei lo cmalu noltru cu co'e— .i vy xaksu lo temci mu'i tu'a lo bukpu selkeipre .i sy binxo lo vajni mutce .i mu'igi da'i da sy lebna vy gi vy klaku

— .i vy se zanfu'a —sei lo gartro cu cusku

ni'o ni'o reci mo'o

— .i coi do'u —sei lo cmalu noltru cu cusku

— .i coi do'u —sei lo vecnu cu cusku

ni'o vy vecnu lo xagze'a bidju poi mansa lo taske .i da tunlo by boi paroi lo jeftu gi'enai za'o lifri lo nu nitcu lo nu pinxe

— .i ki'u ma do ta vecnu —sei lo cmalu noltru cu cusku

— .i mutce tolxaksu lo temci —sei lo vecnu cu cusku— .i lo certu ba'o kanji .i da tolxaksu lo mentu be li muci ca ro jeftu

— .i da pilno lo mentu be li muci ma

— .i da my pilno lo se djica

ni'o «lu mi —sei lo cmalu noltru cu sezysku— va'ogi da'i ka'e pilno lo mentu be li muci gi masno cadzu seka'a lo jinto

ni'o ni'o revo mo'o

ni'o nau djedi li bi fa lo mi nu spofu bu'u lo kutytu'a .i mi pu tirna lo lisri be lo vecnu ca lo nu pinxe lo romoi dirgo be lo mi djacu sorcu

— .i uo —sei mi fi lo cmalu noltru cu cusku— .i mutce melbi fa lo do se morji .i ku'i mi za'o na cikre lo mi vinji .i mi na za'o ponse lo se pinxe .i mi ji'a gleki romu'ei lo du'u mi ka'e masno cadzu seka'a lo jinto

— .i lo mi pendo no'u lo lorxu cu cusku .y

— .i doi dirba cmalu zanpre na za'o srana lo lorxu

— .i ma krinu

— .i lo nu ba morsi ri'a lo nu taske

ni'o ny na jimpe lo mi se racli .i ny spuda di'e

— .i xamgu da fa lo nu da pu se pendo romu'ei ji'asai lo du'u da ba morsi .i mi mutce gleki lo nu mi se pendo lo lorxu

ni'o «lu tu na merli lo ckape —sei mi fi mi cusku— .i tu noroi xagji ja taske .i lo solgu'i toltce tu banzu li'u»

ni'o ku'i ny catlu mi gi'e spuda lo mi se pensi

— .i mi ji'a taske .i .e'e mi'o sisku lo jinto

ni'o mi frumu lo nu tatpi .i fenki fa lo nu cunso sisku lo jinto lo barda pe lo kutytu'a .i ku'i mi'a co'a cadzu

ni'o ca lo nu mi'a ba'o smaji cadzu ze'a lo cacra be li so'o kei lo nicte cu farlu .i lo tarci co'a gusni .i mi ty ganse tai lo nunsenva fau lo nu mi milxe glabi'a ri'a lo nu mi taske .i lo valsi pe lo cmalu noltru cu dansu bu'u lo mi se morji

— .i ke'u do ji'a taske xu —sei mi retsku

ni'o ku'i ny na spuda lo mi preti .i ny sampu cusku di'e

— .i lo djacu ka'e xamgu lo risna ku ji'a

ni'o mi na jimpe lo ny danfu .i ku'i mi smaji .i mi ja'asai djuno lo du'u .einai da retsku fi ny

ni'o ny tatpi .i ny co'a zutse .i mi co'a zutse ne'a ny .ibabo za lo smaji ny cusku di'e

— .i lo tarci cu melbi mu'i tu'a lo xrula poi da ke'a na viska

ni'o mi spusku zo li'a gi'e catlu secau lo nu tavla kei lo canre terplo ni'a lo lunra

— .i lo kutytu'a cu melbi —sei ny jmina cusku

ni'o .i'a jetnu .i mi ze'e prami lo kutytu'a .i da zutse lo canre ma'acma .i da viska node .i da tirna node .i ku'i smaji carmi

— .i melgau lo kutytu'a fa la'e di'e —sei lo cmalu noltru cu cusku— .i ky mipri lo jintyke'a bu'u da

ni'o spaji mi fa lo nu suksa jimpe fi lo selmipri seldirce be lo canre .i mi ca lo nu verba cu xabju lo tolci'o zdani noi ranmi ke'a fa lo nu ke'a mipri lo vamtce .i li'a noroi ku da snada lo nu tolcri kei gi'a ju'ocu'i sisku ji'asai .i ku'i vy selmancygau piro lo zdani .i lo mi zdani cu mipri da bu'u lo condi pe lo zy risna

— .i ie —sei mi fi lo cmalu noltru cu cusku— lo zdani lo tarci lo kutytu'a zo'u lo rinka be lo nu melbi cu nonselji'u

— .i mi gleki —sei ny cusku— lo nu do tugni lo mi lorxu

ni'o lo cmalu noltru cu sipna binxo .iseki'u bo mi jgari ny lo mi birka gi'e di'a litru .i mi cinmo .i mi te simlu lo ka bevri lo ralci vamtce .i mi te simlu lo ji'a sai ka bu'u lo terdi no da zmadu fi lo ka ralci .i mi catlu fi'o te gusni lo lunra lo kandi mebri .e lo ganlo kanla .e lo kerfa bakfu noi desku ri'a lo brife .i mi cusku fi mi fe «lu tu poi mi viska cu pilka po'o .i lo vajni traji cu nonselji'u li'u»

ni'o lo milxe kalri ctebi cu jarco lo xadba nu cisma .isemu'ibo mi fi mi za'o cusku «lu mi cinmo lo tai tsali lo vi sipna ke cmalu noltru ri'a lo nu ti pamsto lo xrula .i ri'a lo pixra be lo rozgu be'o noi dirce ne'i ti tai lo fagri pe lo tergu'i ca ji'asai lo nu ti sipna li'u» .i mi jijnu lo du'u ny semau ralci .i sarcu fa lo nu bandu lo tergu'i .i lo brife kantu ka'e cadri'a ty

ni'o mi ca lo nu ca'o tai cadzu cu tolcri lo jintyke'a ca lo cerni murse

ni'o ni'o remu mo'o

— lo remna —sei lo cmalu noltru cu cusku— cu setca vo'a lo sutra trene .i ku'i na morji lo du'u ry sisku makau .i seki'ubo ry xanka gi'e carna

ni'o ny jmina cusku di'e

— .i na se vamji lo raktu

ni'o lo jintyke'a poi mi'a tolcliva ke'a cu na simsa lo jintyke'a pe la .sa'aras. .i lo jintyke'a pe la .sa'aras. cu sampu kevna te kakpa lo canre .i lo vu zvati cu simsa lo tcadu jintyke'a .i ku'i noda vu tcadu .i mi jinvi lo du'u mi senva

— .i cizra —sei mi fi lo cmalu noltru cu cusku— .i roda bredi .i lo pulni .e lo baktu .e lo skori

ni'o ny cmila gi'e pencu lo skori gi'e cargau lo pulni .i lo pulni cu cmoni tai lo nu cmoni fa lo tolci'o selbifmre ca lo nu lo brife ba'o ze'u sipna

— .i do tirna —sei lo cmalu noltru cu cusku— .i mi'o cikygau lo jintyke'a .i jy sanga

ni'o mi na djica lo nu ny bairgau

— .i .e'e mi zukte —sei mi fi ny cusku— .i dukse lo kamtilju tu'a do

ni'o mi masno lafti lo baktu fe'eco'u lo korbi .i mi by snura punji ky .i lo mi kerlo cu se stali lo se sanga be lo pulni .i mi bu'u lo djacu noi za'o desku cu viska lo nu lo solri cu desku

— .i mi taske lo vu djacu —sei lo cmalu noltru cu cusku— .i ko dy mi dunda ja'e lo nu mi pinxe

ni'o ua mi jimpe lo du'u ny pu sisku makau

ni'o mi lafti lo baktu fe'eco'u lo ny ctebi .i ny pinxe fau lo nu lo kanla cu ganlo .i kukte tai lo tersla .i lo djacu cu ja'asai drata lo cidja .i dy jbena lo nu cadzu ni'a lo tarci kei .e lo se sanga be lo pulni be'o .e lo nu lo mi birka cu bairgau .i dy xamgu lo risna tai lo seldu'a .i ca lo nu mi verba kei lo gusni be fi lo xisnunjbe tricu be'o .e lo zgike be lo ctemidju jdari'i be'o .e lo kampu'a be lo cisma cu tai se gunma lo se dirce be lo xisnunjbe seldu'a be fi mi

— .i lo remna pe lo do terdi —sei lo cmalu noltru cu cusku— cu te cange lo pa purdi lo muki'o rozgu gi'e na tolcri lo se sisku be vo'a py

— .i ry na tolcri —sei mi spusku

— .i ku'i ka'e tolcri lo se sisku be vo'a lo pa rozgu .a lo djacu spisa

— .i li'a —sei mi spusku

ni'o lo cmalu noltru cu jmina cusku

— .i ku'i lo kanla na viska .i .ei sisku sepi'o lo risna

ni'o mi ba'o pinxe .i mi xamgu vasxu .i lo canre ca lo donri cfari cu skari lo bicyladru .i mi gleki lo nu bicyladru skari ku ji'a .i ki'u ma da'i mi badri

— .i .ei do zukte lo do se nupre —sei lo cmalu noltru noi za'ure'u zutse ti'a mi cu nalylau cusku

— .i lo ki'a se nupre

— .i do djuno .i lo molgai seva'u lo mi lanpanzi .i mi fuzme tu'a lo xrula

ni'o mi tolsetca lo mi pixra tocyja'e lo mi daski .i lo cmalu noltru cu viska ty gi'e cmila cusku di'e

— .i lo do tricrbaobao cu milxe simsa lo kobli

— .i ue

ni'o mi tai jgira tu'a lo tricrbaobao

— .i lo do lorxu zo'u lo ly kerlo cu milxe simsa lo jirna gi'e clani dukse

ni'o ny za'ure'u cmila

— .i do na nulpai doi cmalu zanpre .i mi pu kakne lo nu pirfi'i no na'ebo lo ganlo sincrboa .a lo kalri sincrboa

— .i .o'u ba banzu —sei ny cusku— .i lo verba cu djuno

ni'o mi seja'e pisfi'i lo molgai .i lo mi risna cu trati ca lo nu dunda

— .i do platu lo na se djuno be mi

ni'o ku'i ny na spuda mi .i ny cusku di'e

— .i ta'o lo nu mi farlu la .terd. zo'u lo bavlamdei cu detke'u

ni'o ba lo smaji ny za'o cusku di'e

— .i mi pu farlu lo mutce jibni be ti

ni'o ny xunbi'o

ni'o za'ure'uku mi secau lo nu jimpe lo du'u makau krinu cu lifri lo cizra nu dunku .i ku'i lo preti cu tolcanci mi

— .i ja'o na cunso fa lo nu do ca lo nu mi do pu pamoi penmi za lo djedi be li bi cu tai nonkansa cadzu vu lo minli be li ki'o ki lo ro se xabju stuzi .i xu do xruti lo se farlu be do

ni'o lo cmalu noltru za'ure'u xunbi'o

ni'o mi jmina cusku di'e fau lo nu senpi

— .i ki'u ju'ocu'i lo detke'u .y

ni'o lo cmalu noltru za'ure'u xunbi'o .i ny noroi spuda lo preti .i ku'i lo nu da xunbi'o cu sinxa tu'a zo go'i iepei

— .i uinai —sei mi cusku— mi terpa

ni'o ku'i ny spusku di'e

— .i .ei do ca gunka .i .ei do cliva fa'a lo do minji .i mi bu'u denpa .i ko xruti ca lo bavlamvanci

ni'o ku'i mi na surbi'o .i mi morji lo lorxu .i da se ckape lo nu klaku kei lo nu da curmi lo nu tolcicygau da

ni'o ni'o rexa mo'o

ni'o mlana lo jintyke'a fa lo rokci bitmu temfesti .i mi ca lo nu xruti fi lo mi nungunka ca lo bavlamvanci cu darno viska lo mi cmalu noltru noi zutse lo vu galtu fau lo nu lo tuple cu dandu .i mi tirna lo nu ny tavla

— .i ja'o xu do na morji —sei ny cusku— .i na co'e bu'u ti sa'e

ni'o ju'o lo drata voksa cu spuda —sei za'a ny di'e spusku

— .i ie go'i .i lo detri cu drani .i ku'i ti na stuzi

ni'o mi ca'o cadzu fa'a lo bitmu .i mi lo prenu za'o genai viska ginai tirna .iku'i lo cmalu noltru za'ure'u spusku di'e

— .i li'a .i do va viska lo krasi be lo mi tapsni bu'u lo canre .i .ei po'o do denpa mi ky .i mi ba zvati ky ca lo nicte

ni'o mi sepli lo bitmu lo mitre be li reno .i mi za'o viska noda

ni'o lo cmalu noltru di'a cusku di'e baza lo smaji

— .i xu do ponse lo zabna vindu .i ju'opei mi na ba ze'u cortu

ni'o mi se dicra fau lo nu lo risna cu trati .i ku'i mi za'o na jimpe

— .i nauku ko cliva —sei ny cusku— .i mi djica lo nu mi dzikla

ni'o seja'e ku ba'e mi dzigau lo kanla fa'a lo dizlo be lo bitmu .ije ue mi plipe .i sraji fa'a lo cmalu noltru fa lo pelxu since poi catra da ze'i lo snidu be li cino .i mi ca lo nu sisku lo cecla lo mi daski cu co'a bajra .i ku'i ri'a lo sance be mi lo since cu ranti sakli lo canre tai lo djacu jetce poi mrobi'o .i sy secau lo nu dukse sezysutygau cu se julne lo rokci fau lo nu kandi ke jinme savru

ni'o mi tolcliva lo bitmu ca lo satci mapti be lo nu co'a jgari fi lo birka fe lo mi cmalu zanpre noltru noi blabi tai lo snime

— .i ma mo .i ue xu do nau ta'e tavla lo since

ni'o mi ba'o luzgau lo ny ze'e sloska nebyta'u .i mi ba'o cimgau lo ny mebmla gi'e ba'o pixygau ny .i caku mi na darsi lo nu za'o retsku .i ny junri catlu mi gi'e srugau lo ny birka lo mi cnebo .i mi ganse lo nu lo ny risna cu rilgau tai da pe lo cipni poi mrobi'o ca lo nu ba'o cecla danti darxi ke'a .i ny cusku di'e mi

— .i mi gleki lo nu do facki lo du'u makau nabmi lo do minji .i do ba kakne lo nu xruti lo zdani be do

— .i ta'i ma do djuno

ni'o mi ja'a pu pu'o jungau ny lo du'u mi fa'e ro se pacna cu snada lo se gunka be mi

ni'o ny spuda lo mi preti noda .i ku'i ny jmina cusku di'e

— .i mi ji'a ca lo cabdei cu xruti lo me mi moi

ni'o baku badri

— .i ja'asai darmau .i ja'asai nadmau

ni'o mi jijnu lo nu lo rirci cu fasnu .i mi ca'o jgari ny lo mi birka tai lo nu ny cifnu .i ku'i ny simlu lo ka sraji sakli fa'a lo kunti secau lo nu mi kakne lo nu ralte ny

ni'o ny jarco lo junri flira tai lo nu darno catlu

— .i mi ponse lo do lanpanzi .i go'i lo tanxe pe seva'u lo lanpanzi .i go'i lo molgai

ni'o ny badri cisma

ni'o mi ze'u denpa .i mi ganse lo nu ny masno cikyze'a

— .i doi cmalu zanpre do pu terpa

ni'o li'a ny pu terpa .i ku'i ny milxe cmila

— .i mi ba mutce zmadu terpa ca lo vanci

ni'o mi za'ure'u dunja cinmo fi lo selcikrynalka'e .i mi jimpe lo du'u mi na kakne lo nu renvi lo si'o mi ze'e ba na tirna lo nu ny cmila .i ma'i mi cy simsa lo jinto pe lo kutytu'a

— .i doi cmalu zanpre mi djica lo nu za'ure'u tirna lo nu do cmila

ni'o ku'i ny cusku di'e

— .i ca lo nicte cu mulno fa lo nanca be li pa .i lo mi tarci ba zvati lo satci gapru be lo stuzi be lo mi se farlu pe lo purlamnanca

— .i doi cmalu zanpre lo lisri be lo since .e lo nunpenmi .e lo tarci cu mabla se senva iepei

ni'o ku'i ny na spuda lo mi preti .i ny di'e mi cusku

— .i lo vajni na se viska

— .i li'a

— .i co'e tai tu'a lo xrula .i va'o lo nu do prami lo xrula poi zvati lo tarci cu pluka fa lo nu catlu lo tsani ca lo nicte .i ro tarci cu se zvati lo xrula

— .i li'a

— .i co'e tai tu'a lo djacu .i dy poi do ke'a mi dunda tezu'e lo nu pinxe cu simsa lo zgike be lo pulni joi lo skori .i xu do morji .i dy xamgu

— .i li'a

— .i do ba catlu ca lo nicte lo tarci .i lo mi zdani cu dukse lo ka cmalu kei lo nu mi jarco lo du'u makau stuzi lo mi tarci .i la'e di'u xagmau .i lo mi tarci ba me pa tarci ma'i do .i ja'o ro tarci zo'u do ba nelci lo nu catlu ty .i roboi ty do ba pendo .i mi da do ba dunda

ni'o ny boi za'ure'u cmila

— .i .oinai doi zanpre mi mutce se pluka lo nu tirna lo nu do cmila

— .i ba'e ri se dunda mi do .i ba simsa lo djacu

— .i do skudji ma

— .i lo prenu cu ponse lo tarci poi na mintu .i lo tarci seva'u py poi litru cu gidva .i seva'u lo drata cu cmalu te gusni po'o .i seva'u lo drata poi prije cu nabmi .i seva'u lo mi cu'upre cu solji .i ku'i ro lo tai tarci cu smaji .i do ba ponse lo tarci poi no prenu cu ponse lo simsa

— .i do skudji ma

— .i ca lo nu do catlu lo tsani ca lo nicte kei ki'u lo nu mi xabju paboi ty kei ki'u lo nu mi cmila bu'u paboi ty kei ro tarci ba simlu lo ka cmila kei do .i ui do ba ponse lo tarci poi kakne lo nu cmila

ni'o ny za'ure'u cmila

— .i do ca lo nu do ba'o cnikufybi'o (to da roroi cnikufybi'o toi) cu ba gleki lo nu mi do slabu .i do mi ze'e ba pendo .i do ba djica lo nu kansa mi lo nu cmila .i do ba su'oroi kargau lo do canko tezu'e lo nunpluka .i lo do pendo ba mutce se spaji lo nu viska lo nu do cmila fau lo nu catlu lo tsani .i do fi py ba cusku «lu .i'a lo tarci cu roroi gasnu lo nu mi cmila li'u» .i py ba jinvi lo du'u do fenki .i .u'i mi ba ba'o gasnu lo nu do mabla lifri

ni'o ny za'ure'u cmila

— .i si'a da'i mi dunda seba'i tu'a lo tarci lo so'i cmalu jabyboi poi kakne lo nu cmila

ni'o ny za'ure'u cmila .i ba bo ny xruti lo ka junri

— .i ca lo nicte .y .o'e .y ko mi na klama

— .i mi do na ba cliva

— .i mi ba simlu lo ka bilma .i mi ba milxe simlu lo ka mrobi'o .i go'i .i ko na klama tezu'e lo nu viska la'e di'u .i na vamji fa lo nu troci

— .i mi do na ba cliva

ni'o ku'i ny dunku

— .i mi cusku di'e .i krinu fa tu'a lo since ji'a .i .ei sy do na batci .i lo since cu xlali .i ka'e batci mu'i lo nu pluka

— .i mi do na ba cliva

ni'o ku'i da rinka lo nu ny nurcni

— .i je'u sy na za'o ponse lo vindu tepi'o lo nu rere'u batci

ni'o ca lo nicte mi na viska lo nu ny co'a klama .i ny ba'o cliva secau lo savru .i ny ca lo nu mi snada lo nu jorne ny cu jdice cadzu co sutra stapa .i ny cusku di'e po'o

— .i ua do zvati

ni'o ny mi jgari lo xance .i ku'i ny za'o dunku

— .i do srera .i do ba badri .i mi ba simlu lo ka morsi .i ku'i la'e di'u na ba jetnu

ni'o mi smaji

— .i do jimpe .i darno dukse .i mi na kakne lo nu bevri lo xadni .i tilju dukse

ni'o mi smaji

— .i ku'i ba simsa lo tolci'o pilka poi se cliva .i na badri tu'a lo tolci'o pilka

ni'o mi smaji

ni'o ny milxe toldarsybi'o .i ku'i ny za'ure'u troci

— .i ba xamgu .o'e .i mi ji'a ba catlu lo tarci .i ro tarci ba jintyke'a gi'e ponse lo kijyfusra pulni .i ro tarci ba dunda lo se pinxe mi

ni'o mi smaji

— .i ba tai zdile .i do ba ponse munonoki'oki'o jabyboi .i mi ba ponse munonoki'oki'o jinto

ni'o ny ji'a co'a smaji ki'u lo nu ny klaku

— .i tu stuzi .i ko curmi lo nu mi nonkansa stapa

ni'o ny zutse binxo ki'u lo nu ny terpa

ni'o ny di'a cusku di'e

— .i .o'e lo mi xrula zo'u mi fuzme tu'a xy .i xy tai ruble .i xy tai zanbebna .i xy ponse lo vo kinli ku po'osai tepi'o lo nu bandu xy lo munje

ni'o mi zutse binxo ki'u lo nu mi na za'o kakne lo nu sanli sezysarji .i ny cusku di'e

— .i .i'a uo

ni'o ny ze'i za'o senpi .ibabo ny sanli xruti .i ny paroi stapa .i mi na kakne lo nu muvdu

ni'o po'o pelxu lindi ne'a lo ny tupne'o .i ny cu ze'i cando stali .i ny na krixa .i ny smaji farlu tai lo nu lo tricu cu farlu .i na'e savru ri'a tu'a lo canre

ni'o ni'o reze mo'o

ni'o nauku baza lo nanca be li xa mi za'o na ze'e pu cusku lo lisri .i lo pendo poi pu za'ure'u viska mi cu mutce gleki lo nu za'ure'u viska mi fau lo nu mi jmive .i mi pu badri gi'e ku'i cusku «lu ri'a lo nu tatpi li'o li'u»

ni'o nauku mi ba'o milxe surbi'o .i sa'e na mulno .i ku'i mi djuno lo du'u ny pu xruti lo ny plini kei ki'u ca lo co'a donri mi pu na tolcri lo ny xadni .i lo xadni na tai tulji .i mi nelci ca lo nicte lo nu tirna lo tarci .i simsa lo munonoki'oki'o jabyboi

ni'o ku'i fasnu fa lo rirci .i lo molgai poi mi pirfi'i ke'a seva'u lo cmalu noltru zo'u .oi mi fliba lo nu jmina lo skapi skori my .i ny ze'e na ka'e lasna my lo lanpanzi .i seki'ubo mi sezretsku «lu ma pu fasnu bu'u lo ny plini .i xu lo lanpanzi pu citka lo xrula li'u»

ni'o zu'u su'oroiku mi sezysku «lu li'a na go'i .i lo cmalu noltru cu selsantygau ca ro nicte lo ny xrula ni'a lo blacygai gi'e mutce jundi lo ny lanpanzi li'u» .iseki'ubo mi gleki .ije ro tarci cu xutla cmila

ni'o zu'unai su'oroiku mi sezysku «lu da su'oroi tolju'i .i .oi la'e di'u banzu .i ny ca pa vanci na morji tu'a lo blacygai .ija lo lanpanzi cu barkla secau lo savru ca lo nicte li'u» .i seki'ubo ro jabyboi cu binxo lo se klaku

ni'o mutce cizra .i ma'i mi .e do noi ke'a ji'a prami lo cmalu noltru zo'u no pagbu be lo munje cu mintu stali va'o lo nu xukau bu'u lo na slabu be mi'o lo lanpanzi noi na slabu mi'o cu pu citka lo rozgu

ni'o ko catlu lo tsani .i ko sezyretsku di'e .i pau xu lo lanpanzi pu citka lo xrula .i do ba jimpe lo du'u ro da cenba

ni'o ia ze'eku no makcu prenu ba jimpe lo du'u la'e di'u tai vajni

ni'o ti ma'i mi traji lo ka melbi .e lo ka badri kei lo jvinu pe lo munje .i ti mintu lo jvinu pe lo lidne papri .i ku'i mi rere'u pirfi'i fi ti tezu'e lo nu mi ti do drani jarco .i bu'u ti lo cmalu noltru pu tolcanci la .terd. gi'ebabo canci .i ko jundi catlu lo jvinu tezu'e lo nu birti lo du'u dubju'o ti va'o lo nu do litru ca da lo friko bu'u lo kutytu'a .i .e'osai ko va'o lo nu do ti pagre cu na sutra .i ko ze'a denpa ni'asa'e lo tarci .i do va'o lo nu lo verba cu klama do gi'e cmila gi'e se kerfa lo solji se skari gi'e na spuda ca lo nu da retsku cu ba drani smadi lo du'u vy mokau .i va'oku ko xendo gi'e na curmi lo nu mi tai badri .i .e'o zi xatra mi ko lo du'u vy xruti

fa'o